داعش کی ذیلی شاخ اسلامی اسٹیٹ ولایتِ پاکستان کی میڈیا سرگرمیوں میں تشویشناک حد تک اضافہ۔ رپورٹ کے مطابق تنظیم کے میڈیا ونگ ‘ناشرِ پاکستان’ نے حال ہی میں اعلان کیا ہے کہ ان کا پراپیگنڈا میگزین ‘یلغار’ کا انگریزی ایڈیشن جلد منظرِ عام پر آئے گا۔ یہ میگزین 2021 سے مسلسل اردو زبان میں شائع ہو رہا ہے اور اس پر تنظیم کے پرانے نام نداء الحق کا نشان بھی درج ہے۔
سکیورٹی تجزیہ کاروں کے مطابق اس انگریزی ایڈیشن کا مقصد داعش کے انتہاء پسندانہ بیانیے کو بین الاقوامی سطح پر پھیلانا اور عالمی سامعین تک رسائی حاصل کرنا ہے۔ یہ اقدام اسلام آباد میں حالیہ خودکش حملے کے بعد سامنے آیا ہے، جسے ماہرین داعش کی بڑھتی ہوئی سرگرمیوں کی علامت قرار دے رہے ہیں۔
میگزین کے نئے ایڈیشن میں داعش کی کاروائیوں، تنظیمی منصوبہ بندی اور خراسان شاخ کے پروپیگنڈا کو اجاگر کیا جائے گا۔ تجزیہ کاروں نے خبردار کیا ہے کہ داعش اور اس سے وابستہ گروپ جعلی خبروں اور مسخ شدہ حقائق کے ذریعے اپنا پراپیگنڈا پھیلانے کی کوشش کر رہے ہیں۔
سکیورٹی حلقوں میں خدشہ ظاہر کیا جا رہا ہے کہ آئی ایس پی پی کی بڑھتی ہوئی میڈیا سرگرمیاں پاکستان کی سکیورٹی صورتحال کو مزید پیچیدہ بنا سکتی ہیں۔ تنظیم کا عالمی سطح پر اپنا پیغام پھیلانے کا یہ نیا قدم اس کی منظم پروپیگنڈا مہم کا حصہ لگتا ہے۔
دیکھیے: طالبان وزارتِ دفاع کے دعوے مسترد، افغان سرزمین پر دہشت گرد گروہوں کی موجودگی ثابت