سعودی ولی عہد محمد بن سلمان نے خطے میں اسرائیلی حملوں کی شدید مذمت کرتے ہوئے قطر کی حمایت کا اعلان کردیا۔
ولی عہد محمد بن سلمان نے مجلس شوریٰ کونسل کے سالانہ اجلاس سے خطاب کرتے ہوئے کہا کہ قطر کی جانب سے کیے جانے والے ہر اقدام میں اس کے ساتھ کھڑے ہیں۔
انہوں نے مزید کہا کہ اسرائیلی جارحیت کا مقابلہ کرنے اور انہیں روکنے کے لیے بھرپور اقدامات کرنے ہوں گے، ساتھ ہی دوٹوک انداز میں سعودی ولی عہد کا کہنا تھا غزہ فلسطینی سرزمین ہے لہذا کسی قسم کی ظلم و بربریت فلسطینیوں کو ان کے حقوق سے محروم نہیں کر سکتی۔
عرب امارات کے صدر دوحہ پہنچ گئے
متحدہ عرب امارات کے صدر محمد بن زاید النہیان اظہار یکجہتی کے لیے دوحہ پہنچ گئے جہاں قطر کے امیر شیخ تمیم بن حمد الثانی نے ائیرپورٹ پر ان کا استقبال کیا۔
قطر کے وزیراعظم کا کہنا تھا دوحہ پر حملہ اسرائیل کی ریاستی دہشت گردی کا ثبوت ہےجس کا جواب دینے کا ہم بھرپور حق رکھتے ہیں۔
انہوں نے کہا کہ اسرائیلی سفاکیت نے یرغمالیوں کی رہائی کی تمام امیدیں ختم کر دیں، مطالبہ کیا کہ نیتن یاہو کو انصاف کے کٹہرے میں لایا جائے۔
یاد رہے کہ ایک روز قبل اسرائیل نے قطر کے دارالحکومت دوحہ میں حماس قیادت پر حملہ کیا، اس حملے میں حماس کے مرکزی رہنما خلیل الحیا کے بیٹے سمیت کئی اہم افراد شہید ہوئے تاہم اس حملے میں حماس کی قیادت محفوظ رہی۔
دیکھیں: اسرائیل کا قطر میں حماس کی قیادت پر فضائی حملہ، عالمی برادری کی شدید مذمت