راولپنڈی ٹیسٹ کے پہلے روز پاکستان نے کھیل کے اختتام پر 5 وکٹوں پر 259 رنز بنالیے۔
راولپنڈی میں دوسرے ٹیسٹ کے پہلے روز پاکستان نے محتاط انداز میں بیٹنگ کی اور کھیل کے اختتام پر 5 وکٹوں پر 259 رنز بنالیے ہیں۔
سعود شکیل 42 اور سلمان علی آغا 10 رنز کے ساتھ ناٹ آؤٹ ہیں۔
کپتان شان مسعود نے شاندار 87 رنز کی اننگز کھیلی، بابر اعظم 16 رنز بنا کر آؤٹ ہوئے۔
جنوبی افریقا کی جانب سے مہاراج اور ہارمر نے دو، دو کھلاڑیوں کو آؤٹ کیا، ربادا نے ایک وکٹ حاصل کی۔
چائے کے وقفے تک پاکستان نے 3 وکٹوں پر 177 رنز بنالیے، شان مسعود 77 اور سعود شکیل 6 رنز بناکر وکٹ پر موجود ہیں۔
عبداللہ شفیق 57، بابراعظم 16 اور امام الحق 17 رنز بناکرآؤٹ ہوئے، ہارمر نے 2، مہاراج نے 1 کھلاڑی کو آؤٹ کیا۔
قومی ٹیم کے کپتان شان مسعود نے ٹاس کے موقع پر گفتگو کرتے ہوئے کہا کہ ٹیم میں ایک تبدیلی کی ہے، ٹیم میں آصف آفریدی کو ٹیم میں شامل کیا گیا ہے۔
شان مسعود کا کہنا تھا کہ حسن علی کو دوسرے ٹیسٹ میچ سے ڈراپ کر دیا گیا ہے۔
جنوبی افریقہ کے کپتان ایڈن مارکرم کا کہنا ہے کہ ہم ٹاس جیتتے تو بیٹنگ ہی کرتے، ٹیم میں دو تبدیلیاں کی ہیں، کیشو مہاراج اور مارکو ینسن ٹیم میں شامل ہیں۔
مہمان ٹیم کے کپتان یہ میچ جیت کر سیریز برابر کرنے کے خواہاں ہیں، جس کے لیے انہوں نے پلاننگ کر لی ہے۔
جنوبی افریقی کپتان ایڈن مارکرم کا کہنا تھا کہ دوسرے ٹیسٹ میں کم بیک کے لیے پُر امید ہیں اور جیت کے لیے پلان تیار کر لیا ہے۔
ایڈن مارکرم کا کہنا تھا کہ پنڈی میں بھی لاہور ٹیسٹ جیسی پچ بنتی نظر آ رہی ہے۔ پچ کا معائنہ کیا ہے ان کنڈیشنر میں کھیلنا ہمیشہ چیلنجنگ ہوتا ہے۔ تاہم جب میچ شروع ہوگا تو میچ کا اصل اندازہ ہوگا۔ یہ میچ جیت کر ہم سیریز برابر کرنے کی کوشش کریں گے۔
پروٹیز کپتان نے کہا کہ نعمان اور ساجد کے حوالے سے ٹیم میٹنگ میں گفتگو ہوئی ہے۔ ان دونوں اسپنرز کا چیلنج ہمیں پنڈی میں بھی درپیش ہوگا۔ لیکن انہیں کیسے کھیلنا ہے، یہ پلاننگ کر لی ہے۔ امید ہے شائقین کو بہترین کرکٹ دیکھنے کو ملے گی۔
دیکھیں: افغان کرکٹ بورڈ کا ٹرائی سیریز سے دستبرداری کا فیصلہ، پاکستان نے الزامات کو من گھڑت قرار دے دیا
