اسلام آباد، کابل اور انقرہ میں بیک وقت سفارتی سرگرمیاں؛ خطے میں کشیدگی کے باوجود سفارتی عمل جاری

افغانستان کے وزیرِ صنعت و تجارت نورالدین عزیزی حالیہ بھارت کے دورے کے فوراً بعد ایک تجارتی وفد کی سربراہی میں ترکی پہنچ گئے ہیں، جہاں وہ اعلیٰ سطحی حکام اور کاروباری رہنماؤں سے ملاقاتیں کر رہے ہیں۔ عزیزی کا یہ دورہ ایک ایسے وقت میں ہو رہا ہے جب پاکستان اور افغانستان کے درمیان سرحدی کشیدگی، تجارتی رکاوٹوں اور سیکیورٹی تحفظات کے باعث تعلقات تناؤ کا شکار ہیں۔

نورالدین عزیزی نے پانچ روزہ بھارت دورے کے دوران نئی دہلی میں باہمی تجارت، فضائی و زمینی راہداری اور سرمایہ کاری کے امکانات پر گفتگو کی تھی۔ اس دورے نے خطے میں تشویش پیدا کی تھی، خاص طور پر اس پس منظر میں کہ پاکستان افغانستان سے ٹی ٹی پی کے حوالے سے مسلسل شکایات کرتا آ رہا ہے۔ عزیزی کا ترکی پہنچنا خطے میں سفارتی سرگرمیوں کے سلسلے کی ایک اور کڑی سمجھا جا رہا ہے۔ ترکی نہ صرف افغانستان کا قریبی اتحادی ہے بلکہ پاکستان اور افغانستان کے درمیان جاری تناؤ میں ثالثی کا کردار بھی ادا کر رہا ہے۔

اطلاعات کے مطابق ترکی کا ایک اعلیٰ سطحی وفد آئندہ دنوں میں پاکستان کا دورہ کرے گا، جس میں دوطرفہ تعلقات، خطے کی سیکیورٹی صورتِ حال اور افغانستان سے متعلق معاملات پر خصوصی تبادلہ خیال کیا جائے گا۔ انقرہ چاہتا ہے کہ اسلام آباد اور کابل کے درمیان اعتماد سازی بحال ہو اور سرحد پر جاری مسلسل تناؤ کا کوئی پائیدار حل تلاش کیا جائے۔

اسی تناظر میں یہ بات بھی قابلِ ذکر ہے کہ 28 اکتوبر کو ایران میں منعقدہ ایکو وزرائے داخلہ اجلاس کے دوران پاکستان کے وفاقی وزیرِ داخلہ محسن نقوی اور طالبان کے قائم مقام نائب وزیر داخلہ ابراہیم صدر نے نہایت خوشگوار ماحول میں ملاقات کی تھی۔ دونوں رہنماؤں کو ایک ساتھ بیٹھے دیکھا گیا، جبکہ اس دوران استنبول میں پاکستان اور افغانستان کے مابین پسِ پردہ رابطے بھی جاری تھے۔ یہ سرگرمیاں اس جانب اشارہ کرتی ہیں کہ اگرچہ باضابطہ پیش رفت سست ہے، لیکن ڈپلومیٹک چینلز مکمل طور پر بند نہیں ہوئے۔

ماہرین کا کہنا ہے کہ نورالدین عزیزی کے بھارت اور ترکی کے مسلسل دورے افغانستان کی اس نئی حکمت عملی کی عکاسی کرتے ہیں جس کا مقصد علاقائی اقتصادی روابط بڑھانا اور بین الاقوامی تنہائی میں کمی لانا ہے۔ دوسری جانب پاکستان بھی خطے میں توازن برقرار رکھنے کے لیے ترکی سمیت اہم شراکت داروں کے ساتھ قریبی مشاورت میں مصروف ہے۔

تجزیہ کاروں کے مطابق اسلام آباد، کابل اور انقرہ کے درمیان حالیہ رابطوں سے واضح ہوتا ہے کہ خطے میں کشیدگی کم کرنے، تجارتی روانی بہتر بنانے اور سرحدی سیکیورٹی کے لیے کسی نہ کسی سطح پر ثالثی اور مفاہمتی کوششیں جاری ہیں۔ تاہم حتمی پیش رفت کا انحصار اس بات پر ہے کہ افغانستان اپنی سرزمین پاکستان مخالف گروہوں کے استعمال سے روکنے کے بارے میں عملی اقدامات کب اور کس حد تک کرتا ہے۔

دیکھیں: پاکستانی حکام نے افغانستان میں مبینہ فضائی کارروائیوں کے دعوؤں کو یکسر مسترد کر دیا