سابق وزیرِ اعظم وبانیٔ پی ٹی آئی عمران خان کے بیٹے قاسم خان نے برطانوی نشریاتی ادارے اسکائی نیوز کو ایک انٹرویو دیتے ہوئے کہا کہ انہوں نے اور انکے بھائی سلیمان نے اپنے ویزے کے لیے درخواست دے دی ہے اور وہ دونوں جنوری میں پاکستان جانے کا ارادہ رکھتے ہیں۔
تفصیلات کے مطابق قاسم اور سلیمان سے پوچھا گیا کہ کیا انہوں نے عمران سے ملنے کی اجازت لینے کے لیے پاکستانی حکومت سے بات کی کوشش کی جبکہ چند ماہ قبل وزیرِ دفاع خواجہ آصف نے کہا تھا کہ وہ آ کر عمران خان سے مل سکتے ہیں۔ اس پر قاسم نے جواب دیا کہ انہوں نے کھل کر کہا ہے۔ لہٰذا جب تک وہ اپنی بات پر قائم ہیں تو ہمیں امید ہے کہ جنوری میں جانا چاہیے۔
اس سوال کہ وہ عمران خان کو دیکھ کر ان سے کیا بات کریں گے اور کیا وہ ان سے کسی ڈیل پر غور کرنے کا کہیں گے؟ اس پر قاسم خان نے کہا کہ اس وقت سب سے اہم ان کی زندگی اور پاکستان کو بدعنوانی سے نجات دلانا ہے۔
قاسم خان نے مزید کہا کہ اگر وہ ابھی ڈیل کرکے ہمارے پاس آئیں اور انگلینڈ میں رہیں تو میں جانتا ہوں کہ وہ راضی نہیں ہونگے کہ اپنا ملک برباد ہونے کے لیے چھوڑ دوں اور خود انگلینڈ میں رہوں، میں جانتا ہوں کہ وہ ڈپریشن میں چلے جائیں گے۔