انتیس دسمبر 2025 کو سیکیورٹی فورسز نے ضلع باجوڑ کے عمومی علاقے خار میں خفیہ معلومات کی بنیاد پر آپریشن کیا۔ آپریشن بھارتی پراکسی تنظیم فتنۃ الخوارج سے تعلق رکھنے والے خوارج کی موجودگی کی اطلاع پر کیا گیا۔
آپریشن کے دوران سیکیورٹی فورسز نے مؤثر انداز میں دہشت گردوں کے ٹھکانے کو نشانہ بنایا، جس کے نتیجے میں شدید فائرنگ کے تبادلے کے بعد پانچ بھارتی سرپرستی یافتہ خوارج کو ہلاک کر دیا گیا۔
تاہم شدید فائرنگ کے تبادلے کے دوران میجر عادل زمان (عمر 36 سال، سکنہ ضلع ڈیرہ اسماعیل خان)، جو اپنے دستوں کی قیادت اگلے محاذ سے کر رہے تھے، بہادری سے لڑتے ہوئے جامِ شہادت نوش کر گئے۔
ہلاک ہونے والے خوارج کے قبضے سے اسلحہ اور گولہ بارود بھی برآمد کیا گیا۔ یہ خوارج سیکیورٹی فورسز اور قانون نافذ کرنے والے اداروں کے خلاف متعدد دہشت گردانہ کارروائیوں کے علاوہ معصوم شہریوں کے قتل میں بھی ملوث رہے تھے۔
علاقے میں کسی بھی مزید بھارتی سرپرستی یافتہ خارجی کی موجودگی کے خاتمے کے لیے کلیئرنس اور سینیٹائزیشن آپریشن جاری ہیں۔
وفاقی اپیکس کمیٹی کی جانب سے نیشنل ایکشن پلان کے تحت منظور شدہ وژن “عزمِ استحکام” کے مطابق، پاکستان کی سیکیورٹی فورسز اور قانون نافذ کرنے والے ادارے غیر ملکی سرپرستی یافتہ دہشت گردی کے مکمل خاتمے تک اپنی بلا تعطل انسدادِ دہشت گردی مہم پوری قوت کے ساتھ جاری رکھیں گے۔
گورنر خیبرپختونخوا کا خراج تحسین
گورنرخیبرپختونخوا فیصل کریم کنڈی نے 5 بھارتی حمایت یافتہ خوارج کو ہلاک کرنے پر سیکیورٹی فورسز کوخراج تحسین کیا ہے۔ گورنر نے خوارج کیخلاف کامیاب آپریشن پر سیکیورٹی فورسز کی پیشہ ورانہ مہارت و بہادری کی تعریف کی۔
گورنر خیبرپختونخوا نے فائرنگ کے تبادلہ میں شہید ہونیوالے میجر عدیل زمان کو خراج عقیدت پیش کرتے ہوئے لواحقین سے تعزیت و دلی ہمدردی کا اظہار کیا۔ کنڈی نے کہا کہ ڈی آئی خان سے تعلق رکھنے والے بہادر سپوت شہید میجر عدیل زمان کو سلام عقیدت پیش کرتا ہوں۔ دہشتگردوں کے مکمل خاتمہ کیلئے ہمارے شہداء کی قربانیاں رائیگاں نہیں جائیں گی۔