سعودی ولی عہد شہزادہ محمد بن سلمان نے ایرانی صدر مسعود پیژشکیان کے ساتھ ٹیلیفونک گفتگو میں خطے میں موجودہ صورتحال پر تبادلۂ خیال کیا۔ اطلاعات کے مطابق سعودی ولی عہد نے ایرانی صدر کو یقین دلایا کہ سعودی عرب اپنی فضائی حدود یا سرزمین کو ایران کے خلاف کسی بھی فوجی کارروائی کے لیے استعمال نہیں ہونے دے گا۔
سعودی ولی عہد نے دورانِ گفتگو کہا کہ سعودی عرب ایران کی خودمختاری اور علاقائی سالمیت کا احترام کرتا ہے۔ اور سعودیہ ایسے کسی بھی اقدام کی حمایت کرتا ہے جو کشیدگی و تنازعات کو پُر امن طریقے سے حل کروائے، تاکہ خطے کو سلامتی اور استحکام کا گہوارہ بنایا جا سکے۔
ایرانی صدر مسعود پیژشکیان نے سعودی عرب کی اس واضح اور دوٹوک مؤقف پر خوشی کا اظہار کیا۔ انہوں نے ولی عہد محمد بن سلمان کی ان کوششوں کو سراہا جو خطے میں امن و استحکام کے قیام کے لیے جاری ہیں۔ اس موقع پر صدر پیژشکیان کا کہنا تھا کہ اسلامی ممالک کے مابین یکجہتی اور ہم آہنگی ہی خطے میں مستقل امن و سلامتی کی ضامن ہو سکتی ہے۔
تجزیہ کاروں کے مطابق جن ممالک کے مابین دہائیوں سے علاقائی اثر و رسوخ، مذہبی تفریق کی بنیاد پر کشیدہ تعلقات رہے ہیں، ان دو طاقتوں کے مابین براہ راست رابطے کی یہ کوشش ایک اہم پیش رفت ہے۔ ایسی اقدامات کو خطے میں کشیدگی میں کمی اور باہمی اعتماد کی تعمیر کے لیے ایک مثبت قدم قرار دیا جا رہا ہے۔
دیکھیں: ٹرمپ مسٔلہ کشمیر کو بورڈ آف پیس میں شامل سکتے ہیں، بھارت میں خدشات