افغانستان کے صوبہ وردک کے ضلع دایمیرداد کے پولیس سربراہ نے پاکستان میں لڑنے جانے کے حوالے سے سخت مؤقف اختیار کرتے ہوئے واضح کیا ہے کہ کسی بھی شخص کو پاکستان جا کر جنگ لڑنے کی اجازت نہیں دی جائے گی۔ انہوں نے کہا کہ امیر کی اجازت کے بغیر جنگ کے لیے جانا شرعاً حرام ہے، ایسی صورت میں لڑنے والے کی موت بھی حرام تصور ہو گی اور اس کا جہاد ناجائز ہو گا۔
پولیس سربراہ کے مطابق اگر کوئی شخص پاکستان جا کر لڑائی میں مارا جاتا ہے تو اس کی موت کو حرام موت سمجھا جائے گا، اور اگر اس کی لاش افغانستان لائی گئی تو نہ اس کی نمازِ جنازہ ادا کی جائے گی اور نہ ہی اس کے لیے کوئی تعزیتی تقریب منعقد کرنے کی اجازت دی جائے گی۔
انہوں نے مزید کہا کہ پاکستان میں لڑنے کی اجازت اس لیے بھی نہیں دی جا سکتی کیونکہ افغانستان کے ان ممالک کے ساتھ معاہدے موجود ہیں۔ ان کا کہنا تھا کہ جب امریکہ کے ساتھ معاہدہ کیا گیا تھا تو اس میں واضح طور پر لکھا گیا تھا کہ افغانستان کی سرزمین نہ تو ان کے اتحادیوں کے خلاف استعمال ہو گی اور نہ ہی دنیا کے کسی اور ملک کے خلاف۔
پولیس سربراہ نے نوجوانوں کو مخاطب کرتے ہوئے کہا کہ خواہ وہ مدارس میں ہوں یا سرکاری ملازمتوں میں، سب کے لیے عمومی حکم یہی ہے کہ اگر کوئی نوجوان جنگ کے لیے جاتا پایا گیا تو اسے اس کی ملازمت سے برطرف کر دیا جائے گا، جیل میں ڈالا جائے گا اور اس کے خلاف قانونی کارروائی کی جائے گی۔
انہوں نے ایک بار پھر زور دے کر کہا کہ جو بھی شخص لڑنے کے لیے جائے گا، اس کی موت حرام تصور کی جائے گی اور اس کے لیے یہاں مقررہ سزا دی جائے گی۔ ایسے افراد کے لیے نہ جنازہ پڑھا جائے گا اور نہ ہی کسی قسم کی تعزیت کی اجازت ہو گی۔
یہ بیان ایسے وقت میں سامنے آیا ہے جب خطے میں عسکری سرگرمیوں اور سرحد پار نقل و حرکت کے حوالے سے حساس صورتحال پائی جاتی ہے، اور طالبان حکام کی جانب سے پہلی بار اس نوعیت کا واضح اور سخت انتباہ سامنے آیا ہے۔