فیلڈ مارشل سید عاصم منیر نے متحدہ عرب امارات کا اہم سرکاری دورہ کیا، جہاں انہوں نے یو اے ای کے نائب حکمران اور قومی سلامتی کے مشیر شیخ طہنون بن زید النہیان سے ملاقات کی۔ اس ملاقات میں باہمی دلچسپی کے امور اور خطے کی مجموعی سکیورٹی صورتحال پر تفصیلی تبادلۂ خیال کیا گیا۔
آئی ایس پی آر کے مطابق ملاقات کے دوران مختلف شعبوں بالخصوص اقتصادی تعاون، سرمایہ کاری اور سکیورٹی کے شعبوں میں دوطرفہ تعلقات کو مزید مضبوط بنانے کے عزم کا اعادہ کیا گیا۔ فریقین نے خطے میں امن و استحکام کے فروغ کے لیے مسلسل ہم آہنگی اور قریبی رابطوں کی ضرورت پر زور دیا۔
اس موقع پر فیلڈ مارشل سید عاصم منیر نے پاکستان کے لیے متحدہ عرب امارات کے مسلسل تعاون اور حمایت پر شکریہ ادا کیا۔ انہوں نے کہا کہ یہ تعاون دونوں ممالک کے درمیان موجود گہرے تاریخی اور برادرانہ تعلقات کا منہ بولتا ثبوت ہے۔ فیلڈ مارشل نے پاکستان میں معاشی و سماجی ترقی کے لیے متحدہ عرب امارات کے تعمیری کردار کو سراہتے ہوئے اس عزم کا اظہار کیا کہ دونوں ممالک مستقبل میں اپنی اسٹریٹجک شراکت داری کو نئی بلندیوں تک لے جائیں گے۔
واضح رہے کہ یہ ملاقات ایک ایسے وقت میں ہوئی ہے جب پاکستان اپنی معاشی بحالی کے لیے دوست ممالک کے ساتھ سرمایہ کاری کے اہم منصوبوں پر کام کر رہا ہے۔
دیکھیے: فلسطین کاز پر پاکستان کا کردار لائقِ تحسین ہے، ترجمان حماس
