پاک فوج کے سربراہ و چیف آف ڈیفنس اسٹاف، سید عاصم منیر نے آج ابو ظہبی میں متحدہ عرب امارات کے نائب حکمران اور قومی سلامتی مشیر شیخ تنہون بن زید النیہان سے ملاقات کی۔
ملاقات کے دوران دونوں رہنماؤں نے پاکستان اور متحدہ عرب امارات کے درمیان دوطرفہ تعاون کو مزید مضبوط بنانے پر تبادلہ خیال کیا۔ اقتصادی، سرمایہ کاری اور سلامتی کے شعبوں میں اشتراک بڑھانے پر اتفاق کیا گیا، جبکہ خطے کی مجموعی صورتحال اور علاقائی پیش رفت پر بھی تفصیلی گفتگو ہوئی۔ دونوں جانب سے امن اور استحکام کے فروغ کے لیے مربوط اور مشترکہ کوششوں کی اہمیت پر زور دیا گیا۔
فیلڈ مارشل سید عاصم منیر نے متحدہ عرب امارات کی جانب سے پاکستان کی معیشت اور سلامتی کے لیے مسلسل تعاون اور سرمایہ کاری پر شکریہ ادا کیا۔ انہوں نے کہا کہ اماراتی تعاون دونوں ممالک کے درمیان گہرے تاریخی اور برادرانہ تعلقات کا مظہر ہے۔
انہوں نے اماراتی قیادت کے پاکستان میں اقتصادی اور سماجی ترقی کے فروغ میں تعمیری کردار کو سراہتے ہوئے اس عزم کا اعادہ کیا کہ متحدہ عرب امارات کی سلامتی اور استحکام پاکستان کی اپنی سلامتی سے جڑے ہوئے ہیں۔
اعلامیے کے مطابق یہ ملاقات دونوں برادر ممالک کے درمیان غیر معمولی باہمی اعتماد، اسٹریٹجک ہم آہنگی اور آزمودہ برادرانہ روابط کی عکاس ہے۔ اعلیٰ سطحی روابط اس بات کا ثبوت ہیں کہ دونوں ممالک کے درمیان قیادت سے قیادت تک رابطہ مضبوط اور تسلسل کے ساتھ جاری ہے۔
ملاقات میں اس امر کی بھی توثیق کی گئی کہ پاکستان اور متحدہ عرب امارات کے درمیان دیرینہ شراکت داری باہمی مفادات کے تحفظ، علاقائی امن و استحکام اور مشترکہ خوشحالی کے فروغ کے لیے آئندہ بھی جاری رہے گی۔
دیکھیے: ڈنمارک میں بلوچ برادری سے ملاقات: انوار الحق کاکڑ کا افغان صورتحال پر اظہارِ خیال