وزارتِ خارجہ نے بدھ کے روز افغانستان کے ڈپٹی ہیڈ آف مشن کو طلب کر کے باجوڑ میں ہونے والے حالیہ دہشت گرد حملے پر باضابطہ احتجاجی مراسلہ (ڈیمارش) ریکارڈ کرایا ہے۔ اس حملے میں پاک فوج کے 11 جوانوں نے مادرِ وطن کے دفاع میں جامِ شہادت نوش کیا ہے۔
پاکستانی وزارت خارجہ کا کہنا ہے کہ اسلام اباد میں افغان سفارت خانے کے ناظم الامور کو طلب کر کے 16 فروری 2026 کو باجوڑ میں پیش آنے والے حملے کے حوالے سے افغان عبوری حکومت کو سخت احتجاجی مراسلہ (ڈی مارش) پہنچایا۔ جمعرات کو ایک بیان میں وزارت خارجہ نے کہا کہ “اس دہشت گرد حملے کے نتیجے میں 11 پاکستانی فوجی جوان شہید ہوئے”۔ ترجمان طاہر اندارابی کے بیان کے مطابق “پاکستان نے باجوڑ میں پاکستان کی مسلح افواج اور قانون نافذ کرنے والے اداروں کی چوکی پر گاڑی میں نصب خودکش بم حملے، جس کے بعد مسلح فائرنگ کی کاروائی بھی کی گئی، کی شدید ترین الفاظ میں مذمت کی۔
بیان میں مزید کہا گیا کہ وزارتِ خارجہ نے اس امر پر گہری تشویش کا اظہار کیا کہ فتنہ الخوارج/ٹی ٹی پی جس کی قیادت افغانستان میں موجود ہے، افغان سرزمین سے بلا روک ٹوک سرگرمِ عمل ہے۔ اس امر کا اعادہ کیا گیا کہ پاکستان کو افغان عبوری حکومت کی جانب سے متعدد مواقع پر یقین دہانیاں موصول ہوئیں، تاہم ان کے باوجود کوئی نمایاں، ٹھوس اور قابلِ تصدیق اقدام سامنے نہیں آیا۔ بیان کے مطابق “افغان حکومت کو واضح طور پر آگاہ کیا گیا کہ وہ اپنی سرزمین سے سرگرم تمام دہشت گرد گروہوں بشمول ان کی قیادت کے خلاف فوری، مؤثر اور قابلِ تصدیق اقدامات یقینی بنائے”۔ مزید برآں “افغان حکومت کو دو ٹوک انداز میں مطلع کیا گیا کہ پاکستان اپنے فوجیوں، شہریوں اور علاقائی سالمیت کے تحفظ کو یقینی بنانے کے لیے فتنہ الخوارج سے وابستہ عناصر اور ان کے سہولت کاروں کے خلاف جہاں کہیں بھی وہ موجود ہوں، کاروائی کرنے کا حق محفوظ رکھتا ہے۔”
پاکستانی حکام نے افغان انتظامیہ سے شدید مطالبہ کیا کہ وہ اپنی سرزمین کو پاکستان کے خلاف استعمال ہونے سے روکنے کے لیے فوری اور فیصلہ کن اقدامات کرے۔ ڈیمارش میں واضح کیا گیا کہ افغانستان میں دہشت گرد تنظیموں کی موجودگی اور ان کی سرحد پار نقل و حرکت علاقائی امن کے لیے سنگین خطرہ ہے۔ وزارتِ خارجہ نے مطالبہ کیا کہ افغان طالبان اپنی بین الاقوامی ذمہ داریوں کو پورا کرتے ہوئے ٹی ٹی پی کے ٹھکانوں اور قیادت کے خلاف مؤثر کاروائی کو یقینی بنائیں۔
دیکھیے: باجوڑ میں ایف سی و پولیس چیک پوسٹ پر خودکش دھماکہ، تیرہ افراد شہید ہو گئے
