بلوچستان کے ضلع خاران میں سی پیک روڈ پر نامعلوم مسلح افراد نے معدنیات لے جانے والے ٹرکوں پر حملہ کر کے انہیں آگ لگا دی۔
مقامی ذرائع کے مطابق واقعہ کالاگ کراس کے قریب پیش آیا جہاں مسلح افراد نے ٹرک ڈرائیوروں کو روک کر انہیں دھمکیاں دیں اور ٹرکوں کو نذر آتش کر دیا۔
ذرائع کا کہنا ہے کہ حملہ آوروں نے ڈرائیوروں کو خبردار کیا کہ بلوچستان سے معدنیات کی نقل و حمل نہ کی جائے۔
سیکیورٹی ذرائع کے مطابق ابتدائی اطلاعات میں واقعے کے پیچھے بی ایل اے کے ملوث ہونے کا شبہ ظاہر کیا جا رہا ہے۔
ذرائع کے مطابق حملہ آوروں نے مبینہ طور پر ان ٹرکوں کو نشانہ بنایا جنہوں نے بھتہ دینے سے انکار کیا تھا۔
حکام کے مطابق واقعے کے بعد سیکیورٹی فورسز نے علاقے میں سرچ آپریشن شروع کر دیا ہے جبکہ واقعے کی تحقیقات بھی جاری ہیں۔
مقامی ذرائع کے مطابق حملے میں کسی جانی نقصان کی اطلاع نہیں ملی تاہم چار ٹرکوں کو نقصان پہنچا ہے۔