مشرقِ وسطیٰ میں اچانک بھڑکنے والی جنگ کے باعث پاکستان کا فضائی آپریشن شدید متاثر ہوا ہے، جس کے نتیجے میں علامہ اقبال انٹرنیشنل ایئرپورٹ سمیت ملک کے 8 بڑے ہوائی اڈوں سے بیرونِ ملک جانے والی 101 پروازیں منسوخ کر دی گئی ہیں۔
فضائی آپریشن میں تعطل
مشرقِ وسطیٰ کی تازہ صورتحال کے پیشِ نظر ملکی اور غیر ملکی ایئر لائنز کی جانب سے پروازوں کی منسوخی کی ‘سینچری’ مکمل ہو گئی ہے۔ منسوخ ہونے والی پروازوں میں ابوظہبی، بحرین، شارجہ، کویت، قطر، ایران، عراق، آذربائیجان اور دبئی جیسے اہم مقامات شامل ہیں۔ اس اچانک تبدیلی کے باعث لاہور، کراچی، اسلام آباد، پشاور، کوئٹہ، فیصل آباد، ملتان اور سیالکوٹ کے ایئرپورٹس پر پہنچنے والے سینکڑوں مسافروں کو شدید پریشانی کا سامنا کرنا پڑا اور وہ مجبوراََ گھروں کو واپس لوٹ گئے۔
ایئر لائنز کی ہدایات
گزشتہ 24 گھنٹوں کے دوران مشرقِ وسطیٰ میں جنگی صورتحال میں تیزی آنے کے بعد عرب امارات کے لیے شروع کی جانے والی خصوصی پروازوں کا سلسلہ بھی ایک بار پھر معطل ہو گیا ہے۔ فضائی کمپنیوں نے مسافروں کو سختی سے ہدایت کی ہے کہ وہ ایئرپورٹ آنے سے قبل اپنی پرواز کے شیڈول کے بارے میں مکمل معلومات حاصل کر لیں۔ اعداد و شمار کے مطابق گزشتہ 18 روز کے دوران ملک کے مختلف ایئرپورٹس سے اب تک مجموعی طور پر 2 ہزار پروازیں منسوخ ہو چکی ہیں، جو کہ ملکی ہوائی سفر کی تاریخ کا ایک بڑا بحران ہے۔