کل جماعتی حریت کانفرنس نے مقبوضہ جموں و کشمیر میں حالات معمول کے مطابق ہونے کے بھارتی دعوؤں کو یکسر مسترد کرتے ہوئے اسے عالمی برادری کو گمراہ کرنے کا پراپیگنڈا قرار دیا ہے۔ حریت کانفرنس کے مطابق مقبوضہ علاقہ اس وقت دنیا کا وہ واحد خطہ ہے جہاں سب سے بڑی تعداد میں غاصب فوج تعینات ہے۔
بھارتی پراپیگنڈا
کشمیر میڈیا سروس کے مطابق کل جماعتی حریت کانفرنس کے ترجمان ایڈووکیٹ عبدالرشید منہاس نے سری نگر سے جاری بیان میں کہا کہ مودی حکومت دنیا کی آنکھوں میں دھول جھونکنے کے لیے راگ الاپ رہی ہے، جبکہ حقیقت میں کشمیری عوام شدید خوف و دہشت، جبر اور انسانی حقوق کی منظم خلاف ورزیوں کے سائے میں زندگی گزارنے پر مجبور ہیں۔ انہوں نے واضح کیا کہ محض دکھاوے کے اقدامات سے زمینی حقائق کو تبدیل نہیں کیا جا سکتا۔
کشمیریوں پر مظالم
ترجمان حریت کانفرنس نے مقبوضہ علاقے کی سنگین صورتحال کی نشاندہی کرتے ہوئے کہا کہ محاصرے، تلاشی کی کاروائیاں، بلاجواز گرفتاریاں اور کالے قوانین کا بے دریغ استعمال روز کا معمول بن چکا ہے۔ بھارتی فوجیوں نے پوری وادی کو ایک ‘کھلی جیل’ میں تبدیل کر دیا ہے جہاں شہریوں کے بنیادی حقوق سلب کر لیے گئے ہیں۔ انہوں نے قتل و غارت کے بڑھتے ہوئے واقعات پر گہری تشویش کا اظہار بھی کیا۔
عالمی برادری سے مطالبہ
عبدالرشید منہاس نے عالمی برادری سے مطالبہ کیا کہ وہ مقبوضہ جموں و کشمیر کی ابتر صورتحال کا فوری نوٹس لے۔ انہوں نے مطالبہ کیا کہ انسانی حقوق کی بین الاقوامی تنظیموں اور اقوامِ متحدہ کے مبصرین کو مقبوضہ علاقے کا دورہ کرنے کی اجازت دی جائے تاکہ وہ خود وہاں موجود فوجی جبر اور زمینی حقائق کا جائزہ لے سکیں۔