اسلام آباد: مرکزی رویت ہلال کمیٹی نے اعلان کیا ہے کہ ملک میں کہیں بھی شوال کا چاند نظر نہیں آیا، جس کے باعث عیدالفطر ہفتہ 21 مارچ کو منائی جائے گی جبکہ جمعہ کو 30واں روزہ ہوگا۔
چیئرمین مرکزی رویت ہلال کمیٹی مولانا عبدالخبیر آزاد کی زیر صدارت اجلاس اسلام آباد میں ہوا، جس میں محکمہ موسمیات اور سپارکو کے نمائندے بھی شریک ہوئے۔ اس کے ساتھ ملک بھر میں زونل کمیٹیوں کے اجلاس بھی منعقد ہوئے۔
اجلاس کے بعد اعلان کرتے ہوئے مولانا عبدالخبیر آزاد نے کہا کہ کسی بھی علاقے سے چاند نظر آنے کی مصدقہ شرعی شہادت موصول نہیں ہوئی، اس لیے رمضان المبارک 1447 ہجری کے 30 روزے مکمل کیے جائیں گے۔
ذرائع کے مطابق پشاور زونل کمیٹی کو چند شہادتیں موصول ہوئیں، تاہم ان کی شرعی حیثیت تسلیم نہیں کی گئی۔ دیگر کسی بھی زون سے بھی قابلِ قبول شہادت سامنے نہیں آئی۔
حکام کا کہنا ہے کہ ملک بھر میں عیدالفطر ہفتہ 21 مارچ کو مذہبی جوش و جذبے کے ساتھ منائی جائے گی۔
دیکھئیے:پاکستان میں فائیو جی کا آغاز، تین ٹیلی کام آپریٹرز کو لائسنس جاری