پاکستان نے بھارت میں اسرائیلی سفیر کے الزامات کو سختی سے مسترد کر دیا

وزارتِ خارجہ نے بھارت میں متعین اسرائیلی سفیر کی سوشل میڈیا پر وائرل ہونے والی ویڈیو کلپ اور اس میں کیے گئے دعوؤں کو یکسر مسترد کرتے ہوئے حقائق کے منافی قرار دیا ہے۔ ترجمان دفترِ خارجہ طاہر اندرا بی نے میڈیا کے سوالات کا جواب دیتے ہوئے واضح کیا کہ پاکستان اسرائیل کے اس خودساختہ بیانیے کو سختی سے مسترد کرتا ہے۔ انہوں نے کہا کہ عالمی سطح پر جارحیت اور غیر قانونی طرزِ عمل کا اصل ریکارڈ سب کے سامنے ہے، جسے جھٹلایا نہیں جا سکتا۔

عالمی عدالتوں میں اسرائیل کا ریکارڈ

ترجمان دفترِ خارجہ نے اپنے بیان میں اسرائیل کو آئینہ دکھاتے ہوئے کہا کہ فلسطین پر غیر قانونی قبضہ، غزہ میں جاری بدترین انسانی المیہ اور عالمی عدالتوں میں اسرائیلی قیادت کے خلاف زیرِ التواء مقدمات اس بات کا ثبوت ہیں کہ اصل جارح کون ہے۔ انہوں نے مزید کہا کہ ذمہ دار ریاستیں بین الاقوامی قوانین کی پاسداری کرتی ہیں، ان سے نظریں نہیں چراتیں۔

عالمی برادری سے مطالبہ

دفترِ خارجہ نے مطالبہ کا کہ اسرائیل اپنے منفی اقدامات سے توجہ ہٹانے کے لیے دوسروں پر الزامات لگانے کے بجائے عالمی قوانین کا احترام کرے۔ واضح رہے کہ سوشل میڈیا پر گردش کرنے والی ویڈیو میں اسرائیلی سفیر نے من گھڑت الزامات کے ذریعے حقائق کو توڑ مروڑ کر پیش کرنے کی کوشش کی تھی، جس کا پاکستان نے فوری اور موثر سفارتی جواب دیا ہے۔