لاہور: استحکام پاکستان علماء و مشائخ کنونشن میں تمام مکاتبِ فکر کے علماء نے ریاستی پالیسیوں پر مکمل اعتماد کا اظہار کرتے ہوئے وزیراعظم شہباز شریف اور فیلڈ مارشل سید عاصم منیر کی قیادت کی حمایت کا اعلان کیا اور قومی اتحاد و استحکام کیلئے کردار ادا کرنے کے عزم کا اعادہ کیا۔
لاہور میں منعقدہ کنونشن میں علماء نے کہا کہ پاکستان کی عسکری و سیاسی قیادت نے دانشمندانہ حکمت عملی کے ذریعے عالم اسلام کو بڑے تصادم سے بچانے اور امن مذاکرات کو فروغ دینے میں اہم کردار ادا کیا، جسے عالمی سطح پر سراہا جا رہا ہے۔
شرکا نے اس بات پر زور دیا کہ پاکستان آئندہ بھی امت مسلمہ کے اتحاد و وحدت کیلئے فعال کردار ادا کرتا رہے گا، جبکہ سعودی عرب، ترکیہ اور مصر سمیت دیگر اسلامی ممالک کے تعاون کو بھی اہم قرار دیا گیا۔
کنونشن میں ملک دشمن عناصر اور سوشل میڈیا پر جھوٹی معلومات پھیلانے والوں کی مذمت کرتے ہوئے کہا گیا کہ قوم اپنی قیادت کے ساتھ کھڑی ہے اور “پیغام پاکستان” کے تحت امن و استحکام کو فروغ دیا جائے گا۔
اجلاس میں مسجد اقصیٰ کے دروازے بند کرنے اور فلسطینیوں کو نماز سے روکنے کے اسرائیلی اقدام کی شدید مذمت کی گئی اور اسے مذہبی آزادی کی خلاف ورزی قرار دیا گیا۔
کنونشن کے اختتام پر ملک بھر میں ایسے مزید کنونشنز منعقد کرنے کا اعلان کیا گیا تاکہ اتحاد، امن اور استحکام کا پیغام عام کیا جا سکے۔