اسلام آباد: نائب وزیراعظم و وزیر خارجہ اسحاق ڈار نے اعلان کیا ہے کہ ایران نے پاکستانی پرچم بردار مزید 20 جہازوں کو آبنائے ہرمز سے گزرنے کی اجازت دے دی ہے، جسے خطے میں اعتماد سازی اور امن کی جانب اہم پیشرفت قرار دیا جا رہا ہے۔
اپنے ٹویٹ میں اسحاق ڈار نے کہا کہ روزانہ دو پاکستانی جہاز آبنائے ہرمز سے گزریں گے، جو نہ صرف تجارتی سرگرمیوں کیلئے بڑا ریلیف ہے بلکہ خطے میں استحکام کیلئے بھی مثبت اشارہ ہے۔
انہوں نے اس اقدام کو ایران کی جانب سے ایک تعمیری اور قابلِ ستائش پیشرفت قرار دیتے ہوئے کہا کہ یہ فیصلہ امن کے قیام اور کشیدگی میں کمی کیلئے اہم کردار ادا کرے گا۔
وزیر خارجہ کا کہنا تھا کہ ایسے اعتماد سازی کے اقدامات خطے میں استحکام کو فروغ دیتے ہیں اور یہی سفارتکاری اور مذاکرات کا راستہ آگے بڑھنے کا واحد مؤثر ذریعہ ہے۔
اہم پیشرفت یہ بھی سامنے آئی ہے کہ امریکی صدر ڈونلڈ ٹرمپ نے اسحاق ڈار کے اس بیان کو سوشل میڈیا پر ری ٹویٹ کیا، جسے عالمی سطح پر اس اقدام کی اہمیت اور پذیرائی کے طور پر دیکھا جا رہا ہے۔
تجزیہ کاروں کے مطابق آبنائے ہرمز جیسے اہم عالمی بحری راستے میں پاکستانی جہازوں کیلئے سہولتیں بڑھنا نہ صرف معاشی لحاظ سے اہم ہے بلکہ پاکستان کے بڑھتے ہوئے سفارتی کردار کی بھی عکاسی کرتا ہے۔
