کابل: افغانستان کے مختلف علاقوں میں شدید بارشوں، سیلاب اور قدرتی آفات کے نتیجے میں کم از کم 28 افراد جاں بحق جبکہ 49 زخمی ہوگئے، جب کہ بڑے پیمانے پر مالی نقصان بھی رپورٹ ہوا ہے۔
غیر ملکی میڈیا رپورٹس کے مطابق جمعرات سے جاری موسلادھار بارشوں نے کئی صوبوں میں معمولات زندگی مفلوج کر دیے ہیں، جہاں سیلابی ریلوں، مٹی کے تودے گرنے اور آسمانی بجلی کے واقعات نے تباہی مچائی۔
افغان حکام کا کہنا ہے کہ متاثرہ علاقوں میں درجنوں دیہات زیر آب آ گئے جبکہ 100 سے زائد مکانات مکمل یا جزوی طور پر تباہ ہو گئے ہیں، جس کے باعث کئی خاندان بے گھر ہو گئے۔
ریسکیو اور امدادی ٹیمیں متاثرہ علاقوں میں پہنچ کر امدادی کارروائیاں جاری رکھے ہوئے ہیں، تاہم دشوار گزار راستوں اور خراب انفراسٹرکچر کے باعث امدادی کاموں میں مشکلات پیش آ رہی ہیں۔
حکام کے مطابق حالیہ بارشوں نے زرعی زمینوں اور مویشیوں کو بھی نقصان پہنچایا ہے، جس سے مقامی آبادی کو معاشی مشکلات کا سامنا ہو سکتا ہے۔
یاد رہے کہ افغانستان میں رواں سال کے آغاز میں بھی شدید سردی، برفباری اور بارشوں کے باعث 60 سے زائد افراد جاں بحق ہوئے تھے، جس کے بعد حالیہ آفات نے صورتحال کو مزید سنگین بنا دیا ہے۔
ماہرین کے مطابق موسمیاتی تبدیلی کے اثرات کے باعث افغانستان جیسے کمزور انفراسٹرکچر رکھنے والے ممالک میں قدرتی آفات کی شدت اور تعدد میں اضافہ ہو رہا ہے۔