چین نے مشرقِ وسطیٰ میں جاری تنازعات کے حل اور امریکہ و ایران کے مابین فاصلے کم کرنے کے لیے پاکستان کی سفارتی کوششوں کی کھل کر حمایت کا اعلان کر دیا ہے۔ پیر کے روز بیجنگ میں ہفتہ وار بریفنگ کے دوران چینی وزارتِ خارجہ کی ترجمان ماؤ ننگ نے کہا کہ چین، پاکستان کی ان تمام کوششوں کو قدر کی نگاہ سے دیکھتا ہے جو وہ واشنگٹن اور تہران کے درمیان مذاکراتی عمل کو آگے بڑھانے کے لیے کر رہا ہے۔
چینی ترجمان نے علاقائی استحکام کے لیے اسلام آباد کے متحرک کردار کو سراہتے ہوئے کہا کہ صورتحال میں نرمی لانے اور کشیدگی کو کم کرنے کے لیے پاکستان کا کردار نہایت اہمیت کا حامل ہے۔
انہوں نے مزید واضح کیا کہ چین اس مؤقف کی مکمل تائید کرتا ہے کہ پاکستان اپنا ثالثی کردار جاری رکھے تاکہ خطے کو کسی بڑے بحران سے بچایا جا سکے۔ ماؤ ننگ کا کہنا تھا کہ بیجنگ، پاکستان کی ان مخلصانہ کوششوں کا خیر مقدم کرتا ہے جن کا مقصد مشرقِ وسطیٰ میں پائیدار امن کا قیام اور عالمی سلامتی کو یقینی بنانا ہے۔
سیاسی تجزیہ کاروں کے مطابق چین کی جانب سے پاکستان کے سفارتی کردار کی یہ تائید ایک ایسے وقت میں سامنے آئی ہے جب مشرقِ وسطیٰ کی صورتحال نہایت نازک ہے اور عالمی طاقتیں کسی ایسے قابلِ قبول حل کی تلاش میں ہیں جو خطے میں جنگ کے بادلوں کو چھٹ چھٹا سکے۔ چین کا یہ بیان نہ صرف پاکستان کی سفارتی اہمیت کو اجاگر کرتا ہے بلکہ یہ بھی ظاہر کرتا ہے کہ عالمی امن کے لیے بیجنگ اور اسلام آباد ایک ہی صفحے پر موجود ہیں۔