کھیل ہی ترقی اور خوشحالی کی بنیاد ہیں: عالمی یومِ کھیل پر وزیراعظم کا قوم کے نام اہم پیغام

وزیراعظم محمد شہباز شریف نے عالمی یومِ کھیل برائے ترقی و امن کے موقع پر اپنے خصوصی پیغام میں کہا ہے کہ پاکستان آج عالمی برادری کے ساتھ مل کر یہ دن اس عزم کے ساتھ منا رہا ہے کہ کھیل عالمی سطح پر مشترکہ قدر کے طور پر قوموں اور معاشروں کے مابین باہمی تعاون، استقامت اور اتحاد کو فروغ دیتے ہیں۔ انہوں نے زور دیا کہ یہی اقدار انسانی توانائیوں کو مجموعی ترقی اور خوشحالی کے لیے صرف کرنے کی ترغیب دیتی ہیں۔

وزیراعظم نے اپنے پیغام میں کھیلوں کی انفرادی اور سماجی اہمیت پر روشنی ڈالتے ہوئے کہا کہ کھیل نوجوانوں، بشمول خواتین کھلاڑیوں کے لیے صحت مند طرز زندگی کی حوصلہ افزائی کرتے ہیں۔ ان کا کہنا تھا کہ کھیل کی یہ خاصیت ہے کہ یہ باہمی احترام اور مساوات کی بنیاد پر شمولیت کو فروغ دیتا ہے اور سماجی سطح پر اختلافات و مسائل کے حل کے لیے ایک امید افزا اور مثبت ماحول فراہم کرتا ہے۔

حکومتی ترجیحات اور سہولیات کی فراہمی

وزیراعظم شہباز شریف نے واضح کیا کہ حکومتِ پاکستان قومی ترقی اور عالمی سطح پر ملکی نمائندگی میں کھیلوں کے کردار کو مضبوط کرنے کے لیے پوری طرح پرعزم ہے۔ حکومت اسکولوں اور کمیونٹی سطح پر کھیلوں کے فروغ، سہولیات تک رسائی بڑھانے اور کھلاڑیوں کے لیے بین الاقوامی معیار کی تربیت اور مقابلوں کے مواقع فراہم کرنے پر خصوصی توجہ دے رہی ہے۔

کھلاڑیوں کی کامیابیوں پر خراجِ تحسین

پاکستانی کھلاڑیوں کی کارکردگی کو سراہتے ہوئے وزیراعظم نے کہا کہ ہمارے کھلاڑی اپنی صلاحیتوں، محنت اور نظم و ضبط سے تمام کھیلوں میں کامیابیوں کے ذریعے قوم کے لیے باعثِ فخر ہیں۔ انہوں نے کہا کہ کھیل کے میدان میں حاصل ہونے والی کامیابیاں محض ذاتی کارکردگی نہیں بلکہ قومی اتحاد کی بھی عکاسی کرتی ہیں۔

مستقبل کے لیے اداروں سے اپیل

وزیراعظم نے تمام متعلقہ اداروں، کھیلوں کی تنظیموں، اساتذہ اور ترقیاتی شراکت داروں سے اپیل کی کہ وہ مل کر ایک ایسے مستقبل کے لیے کام کریں جہاں پاکستان کے ہر بچے اور نوجوان کو محفوظ اور قابلِ رسائی کھیلوں کے مواقع میسر ہوں۔ انہوں نے اس عزم کا اظہار کیا کہ کھیلوں کا فروغ ہی ایک پرامن اور ترقی یافتہ معاشرے کی ضمانت ہے۔

دیکھیے: سکیورٹی فورسز کا وادیٔ تیراہ میں کامیاب آپریشن: لشکرِ اسلام کے 3 دہشت گرد جہنم واصل