کابل/اسلام آباد: افغانستان کے معروف ہزارہ رہنما اور نیشنل ریزسٹنس فرنٹ سے وابستہ سیاسی شخصیت حاجی محمد محقق نے پاکستان کے کردار کو سراہتے ہوئے کہا ہے کہ ایران اور امریکا کے درمیان کشیدگی کم کرنے میں پاکستان کی کوششوں نے دنیا کو ایک بڑی تباہی سے بچا لیا۔
رپورٹس کے مطابق حاجی محمد محقق نے اپنے بیان میں فیلڈ مارشل عاصم منیر کو مخاطب کرتے ہوئے کہا کہ “آپ کی امن کیلئے کی جانے والی کوششوں نے دنیا کو ایک بڑے سانحے سے محفوظ رکھا”، اور پاکستان کے مثبت سفارتی کردار کو قابلِ قدر قرار دیا۔
انہوں نے پاکستان کے ساتھ تعلقات مضبوط بنانے کی خواہش کا اظہار کرتے ہوئے کہا کہ خطے میں استحکام کیلئے پاکستان کے ساتھ تعاون ضروری ہے، خصوصاً افغانستان میں موجودہ صورتحال کے تناظر میں۔
واضح رہے کہ حاجی محمد محقق افغانستان کی اہم سیاسی شخصیت اور ہزارہ برادری کے نمایاں رہنما ہیں، جو ماضی میں بھی طالبان کے مخالف اتحادوں کا حصہ رہے ہیں اور علاقائی سیاست میں اہم کردار ادا کرتے رہے ہیں۔
تجزیہ کاروں کے مطابق افغان سیاسی شخصیات کی جانب سے پاکستان کے کردار کا اعتراف اس بات کی نشاندہی کرتا ہے کہ حالیہ سفارتی پیش رفت نے خطے میں پاکستان کی اہمیت کو مزید بڑھا دیا ہے۔
دیکھئیے:پاک افغان سرحد پر جھڑپیں، جانی نقصانات کے دعوے، شدید فائرنگ کے تبادلے کے بعد اب صورتحال قابو میں ہے
