اسلام آباد: ایران اور امریکا کے درمیان جنگ بندی کے بعد اسلام آباد عالمی سفارتکاری کا اہم مرکز بن گیا ہے، جہاں وزیراعظم شہباز شریف سے مختلف ممالک کے رہنماؤں نے ٹیلیفونک رابطے کر کے پاکستان کی کوششوں کو سراہا ہے۔
وزیراعظم آفس کے مطابق امیر قطر، بحرین کے بادشاہ، لبنان کے وزیراعظم، آسٹریا کے چانسلر، جرمنی کے چانسلر اور اٹلی کی وزیر اعظم نے وزیراعظم شہباز شریف کو ٹیلی فون کیا اور کامیاب سفارتی کردار پر مبارکباد پیش کی۔
اعلامیے کے مطابق عالمی رہنماؤں نے ایران اور امریکا کے درمیان جنگ بندی اور مذاکرات کی راہ ہموار کرنے میں پاکستان کی کاوشوں کو اہم پیش رفت قرار دیا اور خطے میں امن کیلئے اسلام آباد کے کردار کو سراہا۔
ذرائع کے مطابق گزشتہ 36 گھنٹوں کے دوران وزیراعظم شہباز شریف سے متعدد عالمی رہنماؤں نے رابطے کیے جن میں ایران، سعودی عرب، عمان، کویت، بحرین، قطر، ترکی، مصر، جنوبی افریقہ، اسپین، فرانس، لبنان، آسٹریا، آسٹریلیا اور ازبکستان شامل ہیں۔
حکام کا کہنا ہے کہ یہ سفارتی روابط خطے میں کشیدگی کم کرنے اور آئندہ امن مذاکرات کے انعقاد کیلئے اہم پیش رفت سمجھے جا رہے ہیں، جبکہ اسلام آباد میں ممکنہ مذاکرات پر بھی بات چیت جاری ہے۔
واضح رہے کہ حالیہ پیش رفت کے بعد پاکستان کا سفارتی کردار عالمی سطح پر نمایاں ہوا ہے اور مختلف ممالک کی جانب سے مسلسل رابطے اس اہمیت کو اجاگر کر رہے ہیں۔
