تہران: فیلڈ مارشل سید عاصم منیر نے ایران کے دارالحکومت تہران میں ایرانی فوج کے خاتم الانبیا سینٹرل ہیڈکوارٹر کا دورہ کیا، جہاں ان کی کمانڈر میجر جنرل علی عبداللہی سے ملاقات ہوئی، جس میں علاقائی سکیورٹی صورتحال پر تبادلہ خیال کیا گیا۔
ایرانی میڈیا کے مطابق میجر جنرل علی عبداللہی نے فیلڈ مارشل عاصم منیر کا پرتپاک استقبال کیا۔ ملاقات میں دوطرفہ دفاعی تعاون اور خطے میں امن و استحکام کے امور زیر بحث آئے۔
اس سے قبل فیلڈ مارشل عاصم منیر نے ایرانی پارلیمنٹ کے اسپیکر محمد باقر قالیباف سے بھی ملاقات کی، جس میں اہم علاقائی اور بین الاقوامی امور پر گفتگو کی گئی۔
دورے کے دوران فیلڈ مارشل کی ایرانی وزیر خارجہ عباس عراقچی سے بھی ملاقات ہوئی، جنہوں نے امریکا ایران مذاکرات کی میزبانی پر پاکستان کا شکریہ ادا کیا۔ عباس عراقچی کا کہنا تھا کہ خطے میں امن اور استحکام کے فروغ کے لیے ایران اور پاکستان کا عزم مشترک اور مضبوط ہے۔
واضح رہے کہ فیلڈ مارشل عاصم منیر گزشتہ روز تہران پہنچے تھے، جہاں ان کا دورہ امریکا اور ایران کے درمیان جاری ثالثی کی کوششوں کا حصہ ہے۔ آئی ایس پی آر کے مطابق اس دورے کا مقصد مذاکراتی عمل میں حائل رکاوٹوں کو دور کرنا اور مستقل جنگ بندی کے لیے پیش رفت کو ممکن بنانا ہے۔
