اسلام آباد: آبنائے ہرمز کھلنے کے بعد عالمی منڈی میں تیل کی قیمتوں میں کمی کا اثر پاکستان تک بھی پہنچ گیا، وزیراعظم شہباز شریف نے ڈیزل کی قیمت میں 32 روپے 12 پیسے فی لیٹر کمی کی منظوری دے دی ہے۔
17 اپریل 2026 کو جاری اعلامیے کے مطابق وزیراعظم نے عوام کو فوری ریلیف فراہم کرنے کا فیصلہ کرتے ہوئے ڈیزل کی قیمت کم کرنے کی منظوری دی۔ اس فیصلے کے بعد ڈیزل کی قیمت 385 روپے 54 پیسے سے کم ہو کر 353 روپے 43 پیسے فی لیٹر ہو گئی ہے۔
وزیراعظم شہباز شریف کا کہنا ہے کہ عالمی مارکیٹ میں تیل کی قیمتوں میں کمی کے اثرات کو جتنا جلد ممکن ہو عوام تک منتقل کیا جائے گا، تاکہ مہنگائی کے بوجھ میں کمی لائی جا سکے۔
حکام کے مطابق حالیہ دنوں میں ایران کی جانب سے آبنائے ہرمز کھولنے کے اعلان کے بعد عالمی تیل کی قیمتوں میں نمایاں کمی دیکھنے میں آئی، جس کے بعد پاکستان میں بھی پیٹرولیم مصنوعات کی قیمتوں میں کمی کی راہ ہموار ہوئی۔
ماہرین کے مطابق عالمی سطح پر تیل سستا ہونے سے پاکستان کی درآمدی لاگت کم ہوگی، جس سے نہ صرف ایندھن بلکہ ٹرانسپورٹ اور اشیائے ضروریہ کی قیمتوں پر بھی مثبت اثر پڑنے کا امکان ہے۔
واضح رہے کہ آبنائے ہرمز عالمی تیل سپلائی کا ایک اہم راستہ ہے، اور اس کی بحالی کے بعد عالمی مارکیٹ میں استحکام آنا شروع ہو گیا ہے، جس کا براہ راست فائدہ پاکستان سمیت دیگر درآمدی ممالک کو پہنچ رہا ہے۔
دیکھئیے:آبنائے ہرمز کھلنے کے اعلان پر تیل کی قیمتوں میں بڑی کمی
