بالی وڈ فلم ’حق‘ کے ہدایتکار سپرن ورما نے انکشاف کیا ہے کہ اداکارہ یامی گوتم نے اپنے کردار شازیہ بانو کی تیاری کے لیے چار ماہ تک قرآن پاک کا مطالعہ کیا۔ برطانوی نشریاتی ادارے کو دیے گئے انٹرویو میں انہوں نے بتایا کہ اداکارہ نے اس دوران نہ صرف قرآن پڑھا بلکہ اسے گہرائی سے سمجھا بھی۔ سپرن ورما کے مطابق فلم کی تیاری کے دوران انہوں نے خود بھی یامی گوتم سے قرآن کی تعلیمات سیکھیں۔
ہدایتکار نے واضح کیا کہ ان کا مقصد اسلام سے متعلق معاشرے میں پھیلی غلط فہمیوں کو دور کرنا تھا۔ انہوں نے اسلامی قانون اور شرعی اصطلاحات کو سمجھنے کے لیے ڈیڑھ سال کا عرصہ صرف کیا۔ فلم کا اختتام قرآنی لفظ ’اقراء‘ پر کیا گیا ہے تاکہ علم کی اہمیت کو اجاگر کیا جا سکے۔ سپن ورما کا کہنا تھا کہ وہ خاص طور پر تین طلاق اور مہر کے حوالے سے درست معلومات فراہم کرنا چاہتے تھے۔
فلم کی کہانی سچے واقعات اور جگنا وہرا کی کتاب ’بانو: بھارت کی بیٹی‘ پر مبنی ہے۔ یامی گوتم اور عمران ہاشمی کی یہ فلم ایک ایسی خاتون کی جدوجہد دکھاتی ہے جو اپنے شوہر کی دوسری شادی کے بعد انصاف کے لیے عدالت جاتی ہے۔ ہدایتکار کے مطابق خواتین آج بھی تعصب کا شکار ہیں اور یہ فلم ان کے حقوق کی ترجمانی کرتی ہے۔
دیکھئیے:شادی کے بعد اداکاری چھوڑ دوں گی: رمشا خان کی شادی کے بعد ان کا پرانا ویڈیو کلپ وائرل