کراچی: معروف اداکارہ رمشا خان کی حالیہ شادی کے بعد ان کا ایک پرانا ویڈیو انٹرویو سوشل میڈیا پر تیزی سے وائرل ہو رہا ہے، جس میں انہوں نے شادی کے بعد شوبز انڈسٹری کو خیرباد کہنے اور گھریلو زندگی پر توجہ دینے کے عزم کا اظہار کیا تھا۔
رمشا خان نے حال ہی میں اداکار خوشحال خان سے ایک نجی تقریب میں شادی کی ہے، جس کی تصاویر بھی سوشل میڈیا پر شیئر کی گئی ہیں۔ وائرل ہونے والے پرانے انٹرویو میں رمشا خان کا کہنا تھا کہ وہ عائزہ خان اور حرا مانی جیسی اداکاراؤں کی ہمت کی معترف ہیں جو گھر اور کیریئر کو ایک ساتھ لے کر چلتی ہیں، تاہم ان کے بقول وہ خود ایسا نہیں کر پائیں گی۔ انہوں نے واضح کیا کہ ان کا دل چھوٹا سا ہے اور وہ ایک وقت میں دو ذمہ داریاں نہیں نبھا سکتیں، اس لیے شادی کے بعد وہ گھر پر بیٹھنے کو ترجیح دیں گی۔
دلچسپ بات یہ ہے کہ رمشا خان نے حال ہی میں اپنے انسٹاگرام اکاؤنٹ سے تمام پرانی پوسٹ بھی ڈیلیٹ کر دی ہیں، جس نے ان کے مداحوں کو حیرت میں ڈال دیا ہے۔ شوبز میزبان حسن چوہدری کے مطابق، اداکارہ کی مینیجر ثمرہ خان نے تصدیق کی ہے کہ رمشا گزشتہ سال دسمبر سے ہی اپنے کیریئر سے بریک لینے کا ارادہ رکھتی تھیں اور اب وہ اپنی ازدواجی زندگی کو وقت دینا چاہتی ہیں۔
یاد رہے کہ رمشا اور خوشحال خان کے نکاح کی تصویر وائرل ہونے پر اداکارہ نے اپنی نجی زندگی میں مداخلت پر برہمی کا اظہار بھی کیا تھا۔ ان کے حالیہ اقدامات اور وائرل کلپ سے یہ اشارہ ملتا ہے کہ وہ شاید اب طویل عرصے تک اسکرین پر نظر نہیں آئیں گی۔
شوبز مبصرین کے مطابق رمشا خان کا کیریئر کے عروج پر بریک لینا ان کی ذاتی ترجیحات کی عکاسی کرتا ہے۔ ماہرین کا کہنا ہے کہ بہت سی اداکارائیں شادی کے بعد گھر اور کام میں توازن برقرار رکھنے کی کوشش کرتی ہیں، اس فیصلے کو اداکارہ کی نجی آزادی کے طور پر دیکھا جانا چاہئیے۔
دیکھئیے:عالمی شہرت یافتہ گلوکار زین ملک کا اپنی پاکستانی شناخت پر اظہار فخر