پاک بحریہ کی پہلی ہنگور کلاس آبدوز کی چین میں کمیشننگ کی تقریب منعقد ہوئی، جس میں صدر مملکت آصف علی زرداری نے بطور مہمان خصوصی شرکت کی۔ آئی ایس پی آر کے مطابق، اس تقریب میں چیف آف دی نیول اسٹاف ایڈمرل نوید اشرف بھی موجود تھے۔ اس اہم موقع پر آبدوز کو باضابطہ طور پر پاک بحریہ کے بیڑے میں شامل کر لیا گیا، جو دونوں ممالک کے درمیان دیرینہ دوستی کا ایک نیا باب ہے۔
صدر مملکت آصف علی زرداری نے خطاب کرتے ہوئے کہا کہ آبدوز ‘ہنگور’ کی کمیشننگ پاک بحریہ کی جدت کے سفر میں ایک تاریخی سنگ میل ہے۔ انہوں نے اس عزم کا اعادہ کیا کہ پاکستان اپنی خودمختاری کے دفاع، بحری مفادات کے تحفظ اور اقتصادی راہداریوں کی حفاظت کی مکمل صلاحیت رکھتا ہے۔
چیف آف دی نیول اسٹاف ایڈمرل نوید اشرف نے تقریب سے خطاب میں کہا کہ اہم بحری راستوں کا تعطل عالمی تجارت اور توانائی کی ترسیل کے لیے بڑا خطرہ ہے۔ یہ آبدوزیں جارحیت کو روکنے اور بحیرہ عرب میں اہم سمندری تجارتی گزرگاہوں کی سلامتی کو یقینی بنانے میں کلیدی کردار ادا کریں گی۔ انہوں نے 1971 کی پاک بھارت جنگ کی یاد تازہ کرتے ہوئے بتایا کہ سابقہ ‘ہنگور’ دوسری جنگ عظیم کے بعد کسی بحری جہاز کو تباہ کرنے والی پہلی آبدوز تھی۔
آئی ایس پی آر کے مطابق، ہنگور کلاس آبدوزیں جدید ترین ائیر انڈیپنڈنٹ پروپلشن ٹیکنالوجی، جدید سونار سسٹمز اور اسٹیلتھ ڈیزائن سے لیس ہیں، جو زیرِ آب طویل آپریشنز کی صلاحیت فراہم کرتی ہیں۔ اس تاریخی سنگ میل کے حصول پر وزیراعظم پاکستان اور چیف آف ڈیفنس فورسز نے پوری قوم اور پاک بحریہ کو مبارکباد پیش کی ہے۔
دیکھئیے:پاک فضائیہ کی بھارت پر فضائی برتری کا عالمی اثر؛ چینی طیاروں کی قیمت اور مانگ دوگنی ہو گئی