کوئٹہ: بلوچستان کے مختلف شہروں میں ‘معرکہِ حق: آپریشن بنیان مرصوص’ کے ایک سال مکمل ہونے پر پاک فوج کی حمایت اور بھارت کی جارحیت کے خلاف بڑے پیمانے پر ریلیاں نکالی گئیں۔ گزشتہ سال مئی کے انہی ایام میں پاکستان نے عسکری محاذ پر بھارت کو عبرت ناک ہزیمت سے دوچار کیا تھا، جس کی یاد میں آج صوبے کے غیور عوام نے سڑکوں پر نکل کر اپنی مسلح افواج کو خراجِ تحسین پیش کیا۔
ریلیوں کے شرکاء نے بینرز اور کتبے اٹھا رکھے تھے جن پر ‘پاکستان زندہ باد’ اور ‘پاک فوج کو سلام’ کے نعرے درج تھے۔ مظاہرین کا کہنا تھا کہ بلوچستان کے عوام بھارت کے ناپاک عزائم اور سرحد پار سے ہونے والی دہشت گردی کے خلاف سیسہ پلائی ہوئی دیوار ثابت ہوں گے۔ مقررین نے خطاب کرتے ہوئے کہا کہ گزشتہ سال ہونے والی اس عسکری جھڑپ نے دنیا پر ثابت کر دیا کہ بھارت کی نام نہاد فوجی برتری محض ایک سراب ہے، جبکہ پاکستان کی ‘مڈل پاور’ کے طور پر ابھرتی ہوئی ساکھ نے سفارتی محاذ پر بھی نئی تاریخ رقم کی ہے۔
تجزیہ کاروں کے مطابق، بلوچستان میں انڈیا کے خلاف پائے جانے والے شدید جذبات کی بڑی وجہ بھارت کی جانب سے صوبے میں عدم استحکام پیدا کرنے کی مسلسل کوششیں ہیں۔ ‘آپریشن بنیان مرصوص’ کی کامیابی نے نہ صرف دفاعی بلکہ نفسیاتی محاذ پر بھی بھارت کو شکستِ فاش دی، جس کے نتیجے میں آج بلوچستان کا بچہ بچہ اپنی ریاست کے بیانیے کے ساتھ کھڑا ہے۔
سفارتی محاذ پر بھی پاکستان نے اس معرکے کے بعد اپنی پوزیشن کو اس حد تک مستحکم کیا کہ عالمی طاقتوں نے اسلام آباد کے علاقائی استحکام اور امن و امان کے لیے کیے جانے والے اقدامات کو تسلیم کیا۔ آج کی ان ریلیوں نے واضح پیغام دیا ہے کہ پاکستان کی علاقائی سالمیت پر کوئی سمجھوتہ نہیں کیا جائے گا اور بلوچستان کے عوام اپنی افواج کے شانہ بشانہ کھڑے ہیں۔
دیکھئیے:ہنگو میں سکیورٹی فورسز کی بڑی کاروائی: فتنہ الخوارج کے 100 سے زائد دہشت گردوں کی دراندازی ناکام