جنوبی وزیرستان کے مختلف علاقوں میں بھارت کے خلاف کامیاب آپریشن بنيان مرصوص” کی تاریخی کامیابی اور معرکہ حق کا ایک سال مکمل ہونے پر شاندار تقریبات کا آغاز ہو گیا ہے۔ مئی 2025 میں دشمن کے خلاف حاصل کی گئی اس عظیم فتح کی یاد میں منعقدہ یہ پروگرامز حب الوطنی اور قومی یکجہتی کا بھرپور مظہر ہیں۔
اسکولوں میں خصوصی پروگرامز
ضلع کے مختلف اسکولوں میں اس تاریخی دن کی مناسبت سے خصوصی تقریبات کا انعقاد کیا گیا جہاں طلبہ نے جوش و جذبے کے ساتھ ملی نغمے پیش کیے۔ بچوں نے اپنی تقاریر میں دفاعِ وطن کے عزم کا اعادہ کیا، جبکہ فضا “پاکستان زندہ باد” اور “پاک فوج زندہ باد” کے فلک شگاف نعروں سے گونجتی رہی۔
عوامی جوش و خروش اور شرکاء کی شرکت
تقریبات میں بچوں کے علاوہ قبائلی عمائدین اور مقامی افراد کی ایک بڑی تعداد نے شرکت کی۔ شرکاء نے قومی پرچم اور بینرز اٹھا رکھے تھے، جن پر پاک افواج کی بہادری اور شہداء کی عظیم قربانیوں کو سراہنے والے کلمات درج تھے۔ مقامی افراد کا کہنا تھا کہ یہ دن ہمیں اپنی افواج کی پیشہ ورانہ مہارت اور دشمن کے ناپاک عزائم کو خاک میں ملانے کی یاد دلاتا ہے۔
قومی یکجہتی کا پیغام
شرکاء نے پاک افواج کی بہادری اور دفاعِ وطن کے لیے پیش کی گئی قربانیوں کو زبردست خراجِ عقیدت پیش کیا۔ مقررین نے اپنے خطاب میں واضح کیا کہ جنوبی وزیرستان کے عوام اپنی افواج کے شانہ بشانہ کھڑے ہیں اور یہ تقریبات عوامی محبت اور فوج کے ساتھ مضبوط بندھن کی عکاس ہیں۔ یہ دن جنوبی وزیرستان میں قیامِ امن اور استحکام کی نئی علامت بن کر ابھرا ہے۔