سکیورٹی فورسز نے بلوچستان کے اضلاع قلات اور خضدار کے مختلف علاقوں میں دہشت گردوں کے خلاف بڑی کامیابی حاصل کرتے ہوئے 7 سے زائد شرپسندوں کو ہلاک کر دیا ہے۔ انٹیلی جنس معلومات پر مبنی یہ منظم کاروائیاں اورناچ، چاپر اور ان کے گردونواح میں کی گئیں۔
سکیورٹی ذرائع کے مطابق یہ آپریشنز دہشت گردوں کی موجودگی کی خفیہ اطلاعات پر کیے گئے تھے۔ کارروائی کے دوران دہشت گردوں اور سکیورٹی فورسز کے درمیان شدید فائرنگ کا تبادلہ ہوا، جس کے نتیجے میں 7 سے زائد دہشت گرد مارے گئے۔
ہلاک ہونے والے دہشت گردوں کا تعلق کالعدم بی ایل اے اور ‘فتنہ الہندستان’ نیٹ ورکس سے بتایا جاتا ہے، جو علاقے میں تخریب کاری کی سنگین وارداتوں میں ملوث تھے۔
فورسز نے کاروائی کے بعد دہشت گردوں کے ٹھکانوں کو مکمل طور پر کلیئر کر دیا ہے۔ ترجمان کے مطابق، علاقے میں مکمل امن و استحکام کو یقینی بنانے اور ممکنہ دیگر سہولت کاروں کے خاتمے کے لیے سرچ اینڈ کلیئرنس آپریشنز تاحال جاری ہیں۔
سکیورٹی اداروں نے عزم ظاہر کیا ہے کہ بلوچستان میں امن و امان کی صورتحال پر کوئی سمجھوتہ نہیں کیا جائے گا اور دہشت گردی کے مکمل خاتمے تک کارروائیاں جاری رہیں گی۔