اسماعیلی کمیونٹی کے روحانی پیشوا پرنس رحیم آغا خان پنجم کے گلگت بلتستان کے انتہائی اہم اور تاریخی دورے کی تیاریاں عروج پر پہنچ چکی ہیں، جس کے باعث علاقے میں وفاقی اور علاقائی وسائل کو بڑے پیمانے پر متحرک کر دیا گیا ہے۔ حکام کے مطابق پرنس رحیم آغا خان 20 سے 25 مئی تک گلگت بلتستان کا دورہ کریں گے، جہاں انہیں حکومتِ پاکستان کی جانب سے سرکاری مہمان کا اعلیٰ درجہ دیا جائے گا۔ اپنے اس 5 روزہ دورے کے دوران وہ خطے کے مختلف اضلاع کا دورہ کریں گے، متعدد عوامی اجتماعات میں شرکت کریں گے اور اہم تقریبات سے خطاب بھی کریں گے۔
ان تمام تر انتظامی اور سکیورٹی منصوبوں کا تفصیلی جائزہ جمعہ کے روز منعقدہ ایک اعلیٰ سطح کے اجلاس میں لیا گیا، جس کی صدارت وفاقی وزیر برائے امورِ کشمیر و گلگت بلتستان انجینئر امیر مقام نے کی۔ اجلاس میں گلگت بلتستان کے چیف سیکرٹری، انتظامی سیکرٹریز، قانون نافذ کرنے والے اداروں کے اعلیٰ نمائندے اور اسماعیلی ریجنل کونسل کے عہدیداران شریک ہوئے۔ اجلاس کے دوران وفاقی وزیر کو دورے کے حوالے سے کی جانے والی تیاریوں پر تفصیلی بریفنگ دی گئی۔
حکام نے بریفنگ کے دوران توقع ظاہر کی ہے کہ ہنزہ کے مشہورِ زمانہ پاسو کونز، گلگت شہر، گاہکوچ بالا اور تاؤس یاسین میں پرنس رحیم آغا خان کے استقبال کے لیے بڑے عوامی اجتماعات منعقد ہوں گے۔ انتظامیہ کی جانب سے بعض مقامات پر زائرین اور عقیدت مندوں کے غیر معمولی ہجوم کو منظم رکھنے اور نظم و ضبط برقرار رکھنے کے لیے متعدد نشستیں منعقد کرنے پر بھی غور کیا جا رہا ہے۔ اس کے علاوہ دورے کے دوران زائرین کی سہولت کے لیے اضافی ٹرانسپورٹ اور سفری اوقات میں خصوصی نرمی کا بھی بندوبست کیا جا رہا ہے۔
سکیورٹی اور سفر کے متبادل اور محفوظ انتظامات کے لیے وفاقی حکومت سے بلٹ پروف گاڑی فراہم کرنے کی درخواست کی گئی ہے۔ انتظامیہ نے متبادل راستے کے طور پر بابوسر روڈ کو فوری طور پر کھولنے اور حساس مقامات پر نیشنل ہائی وے اتھارٹی (این ایچ اے) کو چوبیس گھنٹے الرٹ رکھنے کی سفارش کی ہے۔
اجلاس میں پولیس اور فرنٹیئر ورکس آرگنائزیشن (ایف ڈبلیو او) کو خصوصی ذمہ داریاں سونپی گئی ہیں تاکہ ناصیرآباد پل سے لے کر سست ڈرائی پورٹ تک قراقرم ہائی وے پر سڑکوں کی فوری مرمت و بہتری، ٹریفک کی بلا تعطل روانی اور فول پروف سیکیورٹی کو ہر صورت یقینی بنایا جا سکے۔
مزید برآں، انتظامیہ نے متعلقہ محکموں کو سخت ہدایت جاری کی ہے کہ بالائی ہنزہ اور اس سے ملحقہ تمام علاقوں میں معزز مہمان کے دورے کے دوران بجلی کی بلا تعطل فراہمی کو یقینی بنایا جائے۔ اجلاس کے اختتام پر اسماعیلی ریجنل کونسل کے نمائندوں نے اب تک کیے گئے حکومتی انتظامات پر مکمل اطمینان کا اظہار کیا، جبکہ وفاقی وزیر امیر مقام نے یقین دلایا کہ وفاقی حکومت اس تاریخی دورے کو شاندار اور کامیاب بنانے کے لیے گلگت بلتستان انتظامیہ کے ساتھ اپنا بھرپور اور ہر ممکن تعاون جاری رکھے گی۔