پنجاب کے مختلف شہروں میں سی ٹی ڈی نے انٹیلی جنس معلومات پر مبنی مؤثر کارروائیاں کرتے ہوئے 13 مبینہ دہشت گردوں کو گرفتار کر لیا ہے۔ حکام کے مطابق ان کاروائیوں کے نتیجے میں قانون نافذ کرنے والے اداروں پر حملوں کا ایک بڑا منصوبہ ناکام بنا دیا گیا ہے۔
ترجمان سی ٹی ڈی کی جانب سے جاری کردہ بیان کے مطابق یہ سرچ آپریشنز صوبے کے متعدد اضلاع بشمول لاہور، ساہیوال، ملتان، جہلم، منڈی بہاؤالدین، جھنگ، چنیوٹ اور میانوالی میں کیے گئے۔ لاہور میں ہونے والی ایک اہم کاروائی کے دوران فتنہ الخوارج سے تعلق رکھنے والے انتہائی خطرناک اور مطلوب دہشت گرد مختار کو حراست میں لیا گیا ہے، جو سکیورٹی اداروں کے لیے ایک بڑی کامیابی ہے۔
سی ٹی ڈی حکام کا کہنا ہے کہ گرفتار کیے جانے والے شرپسندوں کے قبضے سے بھاری مقدار میں ممنوعہ لٹریچر، دھماکا خیز مواد، ہینڈ گرینیڈ، آئی ای ڈیز (آئی مائزڈ ایکسپلوسو ڈیوائسز) اور ڈیٹونیٹرز برآمد ہوئے ہیں، جنہیں تخریب کاری کی بڑی کارروائیوں میں استعمال کیا جانا تھا۔
ترجمان نے مزید کہا کہ گرفتار دہشت گرد قانون نافذ کرنے والے اداروں کے دفاتر اور حساس تنصیبات کو نشانہ بنانے کی منصوبہ بندی کر رہے تھے۔ تمام ملزمان کو نامعلوم مقام پر منتقل کر کے انسدادِ دہشت گردی کی دفعات کے تحت مقدمات درج کر لیے گئے ہیں اور ان کے نیٹ ورک کے دیگر ارکان کی گرفتاری کے لیے تحقیقات کا دائرہ وسیع کر دیا گیا ہے۔
