جنوبی وزیرستان کے علاقے وانا کے قریب سکیورٹی فورسز نے انٹیلی جنس معلومات پر مبنی کامیاب کاروائی کے دوران فتنہ الخوارج کے 4 دہشت گردوں کو جہنم واصل کر دیا ہے۔ سکیورٹی ذرائع کے مطابق یہ کاروائی وانا کے نواحی علاقے ثمر باغ میں خوارجی عناصر کی موجودگی کی خفیہ اور مصدقہ اطلاع پر عمل میں لائی گئی۔
ابتدائی اطلاعات کے مطابق سکیورٹی فورسز نے جب دہشت گردوں کے ٹھکانے کو گھیرا تو اس وقت خوارج نے قانون کی گرفت سے بچنے کے لیے ایک مقامی مسجد میں پناہ لے رکھی تھی۔ فورسز نے انتہائی حکمتِ عملی کے ساتھ مسجد کے تقدس کو برقرار رکھتے ہوئے بھرپور کاروائی کی، جس کے نتیجے میں وہاں چھپے چاروں خوارج مارے گئے۔
سکیورٹی حکام کا کہنا ہے کہ خوارجی عناصر کی جانب سے مساجد جیسے مقدس مقامات کو اپنی مذموم اور دہشت گردانہ سرگرمیوں کے لیے بطور ڈھال استعمال کرنا نہایت قابلِ مذمت اور اسلامی تعلیمات کے سراسر خلاف ہے۔
مساجد اللہ کی عبادت، امن، بھائی چارے اور انسانیت کے احترام کی علامت ہیں، اور انہیں دہشت و خونریزی کے لیے استعمال کرنا بدترین جرم ہے۔ حکام نے عزم کا اظہار کیا ہے کہ ملک سے آخری خارجہ کے خاتمے تک فتنہ الخوارج کے خلاف سکیورٹی فورسز کی یہ بلاامتیاز کاروائیاں جاری رہیں گی۔
دیکھیے: پنجاب کے مختلف شہروں میں آپریشنز، 13 دہشت گرد گرفتار
