بنوں: پاکستان کی سکیورٹی فورسز نے خیبر پختونخوا کے ضلع بنوں کے علاقے باکا خیل میں ایک کامیاب آپریشن کرتے ہوئے فتنہ الخوارج کے ایک انتہائی اہم اور مطلوب کمانڈر شاہد عرف کمانڈو کو ہلاک کر دیا ہے۔ سیکیورٹی فورسز کی اس کارروائی کے دوران متعدد دیگر خارچی جنگجوؤں کے شدید زخمی ہونے کی بھی اطلاعات ہیں۔
ہلاکت کی تصدیق
رپورٹ کے مطابق فتنہ الخوارج سے وابستہ خفیہ اور انکرپٹڈ مواصلاتی چینلز نے باقاعدہ طور پر اپنے اہم کمانڈر شاہد عرف کمانڈو کی ہلاکت کی تصدیق کر دی ہے۔ دہشت گرد تنظیم کے اندرونی نیٹ ورکس پر اس ہلاکت کو گروپ کے لیے ایک بڑا دھچکا قرار دیا جا رہا ہے۔
انٹیلیجنس نیٹ ورک
ہلاک ہونے والا خارچی کمانڈر شاہد بنوں اور اس کے گردونواح کے علاقوں میں فتنہ الخوارج کے نام نہاد انٹیلیجنس نیٹ ورک کا ایک انتہائی فعال اور کلیدی رکن تھا۔ اس کے ساتھ ساتھ وہ سیکیورٹی فورسز کے خلاف زہریلے پروپیگنڈے اور تنظیم کی دیگر تشہیری سرگرمیوں کے لیے سوشل میڈیا نیٹ ورک کو چلانے میں بھی براہِ راست ملوث تھا۔
فورسز کی کاری ضرب
دفاعی ماہرین کا کہنا ہے کہ شاہد عرف کمانڈو کی ہلاکت سے فتنہ الخوارج کے مقامی انٹیلیجنس اور ڈیجیٹل پروپیگنڈا نیٹ ورک کو شدید نقصان پہنچا ہے۔ سیکیورٹی فورسز کی جانب سے علاقے میں دہشت گردوں کے مکمل خاتمے اور امن و امان کی صورتحال کو برقرار رکھنے کے لیے سرچ آپریشن اور مانیٹرنگ کا عمل مزید سخت کر دیا گیا ہے۔
