روم: اٹلی کے شہر امینڈولارا میں ایک گاڑی کو آگ لگائے جانے کے نتیجے میں تین افغان شہریوں کی ہلاک کے بعد طالبان نواز افغان میڈیا بالخصوص طلوع نیوز نے اس واقعے کو پاکستان مخالف بیانیے میں ڈھالنے کی باقاعدہ کوششیں شروع کر دی ہیں۔ افغان میڈیا کی جانب سے سوشل میڈیا پر یہ دعویٰ کیا جا رہا ہے کہ یہ افغان شہری دو پاکستانیوں (سعید احمد اور علی رضا) کے ہاتھوں مبینہ اجرت کے تنازع پر مارے گئے، اور واقعے میں دو پاکستانیوں کو گرفتار بھی کیا گیا ہے۔
تاہم زمینی حقائق اور اطلاعات کے مطابق یہ حملہ مقامی اطالوی شہریوں نے کیا تھا اور بعض پروپیگنڈا ذرائع اس واقعے کی تمام تر ذمہ داری پاکستان پر ڈالنے کے لیے من گھڑت کہانیاں تراش رہے ہیں۔
ردِعمل اور حقائق
حقیقت یہ ہے کہ غیر قانونی افغان مہاجرین سے متعلق جرائم، قانون شکنی اور عوامی سلامتی کے مسائل پر اطالوی مقامی آبادی میں پہلے ہی شدید بے چینی اور ناراضی پائی جاتی تھی۔ قتل، جنسی جرائم، منشیات کی اسمگلنگ، ڈکیتیوں، غیر قانونی بستیوں اور منظم مجرمانہ سرگرمیوں سے متعلق برسوں پر محیط عوامی خدشات نے بعض علاقوں میں افغان مہاجرین کے خلاف مقامی شہریوں کے ردِعمل کو شدید تقویت دی ہے۔
یہ افغان شہری اٹلی میں اطالوی شہریوں کے ہاتھوں ہی مارے گئے ہیں، جو غیر قانونی امیگریشن اور عوامی تحفظ سے متعلق بڑھتی ہوئی تشویش کے باعث شدید غصے کا اظہار کر رہے تھے۔
حکام کا کردار اور یورپی بحران
ذرائع کے مطابق اطالوی حکام پر یہ شبہ ظاہر کیا جا رہا ہے کہ وہ سیاسی ردِعمل اور افغان غیر قانونی امیگریشن سے متعلق ملک میں بڑھتی ہوئی بحث کو محدود رکھنے کے لیے اس حملے میں مقامی اطالوی شہریوں کے اصل کردار کو پسِ منظر میں رکھنے کی کوشش کر رہے ہیں، جس کا فائدہ اٹھا کر افغان میڈیا اسے پاکستانیوں اور افغانوں کے درمیان جھگڑے کے طور پر پیش کر رہا ہے۔
واضح رہے کہ غیر قانونی امیگریشن کے خلاف بڑھتے ہوئے اس عوامی ردِعمل نے یورپی حکومتوں کو پہلے ہی سرحدی کنٹرول سخت کرنے، ملک بدریوں میں اضافے اور قانون کے سخت نفاذ جیسے اقدامات کی جانب دھکیلا ہے۔ یہ افسوسناک واقعہ دراصل افغان ہجرت کے مسئلے سے جڑے اسی وسیع تر سماجی اور سیاسی تناؤ کی عکاسی کرتا ہے، جس سے نمٹنے میں متعدد یورپی حکومتیں مشکلات کا سامنا کر رہی ہیں، مگر طالبان نواز میڈیا اسے پاکستان کے خلاف ایک منظم ہتھیار کے طور پر استعمال کرنے کی ناکام کوشش کر رہا ہے۔