پاکستان نے بھارت کو سخت ترین الفاظ میں خبردار کیا ہے کہ پاکستانی پانی روکنے کی کوئی بھی یکطرفہ کوشش اعلانِ جنگ تصور کی جائے گی۔ اسلام آباد کا کہنا ہے کہ پانی کو سیاسی دباؤ یا تزویراتی ہتھیار کے طور پر استعمال کرنا کسی صورت قابلِ قبول نہیں اور ایسے اقدامات خطے کے امن و سلامتی کو سنگین خطرات سے دوچار کر سکتے ہیں۔
اسلام آباد میں ہفتہ وار پریس بریفنگ کے دوران ترجمان دفتر خارجہ طاہر حسین اندرابی نے ملک کے تزویراتی موقف کو واضح کرتے ہوئے کہا کہ پاکستان کے آبی وسائل سے متعلق حقوق اور مفادات ناقابلِ تنسیخ ہیں، جن کا ہر سطح پر بھرپور اور مؤثر دفاع کیا جائے گا۔
انہوں نے دوٹوک الفاظ میں کہا کہ اگر نئی دہلی کی جانب سے بین الاقوامی قوانین یا دوطرفہ معاہدوں کی خلاف ورزی کرتے ہوئے پانی کے بہاؤ کو متاثر کرنے کی کوشش کی گئی، تو پاکستان اس کا سخت ترین جواب دینے کا حق محفوظ رکھتا ہے۔
ترجمان دفتر خارجہ کا مزید کہنا تھا کہ پاکستان اپنے دیرینہ آبی حقوق کے تحفظ کے لیے سفارتی، قانونی اور سیاسی تمام ذرائع استعمال کرنے کے لیے مکمل طور پر پرعزم ہے۔
انہوں نے بین الاقوامی برادری پر بھی زور دیا کہ وہ خطے میں پانی کے حساس معاملے پر بھارتی جارحیت اور یکطرفہ بیانات کا نوٹس لے، کیونکہ کسی بھی مہم جوئی کے نتیجے میں پیدا ہونے والی صورتحال کی تمام تر ذمہ داری بھارت پر عائد ہوگی۔
دیکھیے: مقبوضہ کشمیر پر بھارتی قبضہ، آزاد کشمیر سے موازنہ حقائق کے منافی ہے: دفترِ خارجہ