شمالی وزیرستان میں سکیورٹی فورسز نے دہشت گردوں کے خلاف اب تک کی سب سے بڑی اور مؤثر کاروائیاں کرتے ہوئے 62 عسکریت پسندوں کو ہلاک کر دیا ہے، جن میں 4 انتہائی مطلوب کلیدی کمانڈرز بھی شامل ہیں۔ سکیورٹی ذرائع کے مطابق یہ ہلاکتیں یکم جون سے 12 جون تک جاری رہنے والے ایک بڑے اور مربوط آپریشن کے دوران ہوئیں۔
سکیورٹی ذرائع کے مطابق آپریشن آئرن فسٹ 3 کے تحت میرانشاہ کے قریبی علاقوں پلنگزئی، خوئیزی اور ندیم کوٹ کو دہشت گردوں سے مکمل طور پر پاک کر دیا گیا ہے۔ کامیاب کاروائی کے دوران عسکریت پسندوں کے 14 خفیہ ٹھکانے اور مراکز تباہ کیے گئے، جن میں زیرِ زمین بنائی گئی سرنگیں بھی شامل ہیں۔
جھڑپ کے دوران دہشت گردوں کے اسلحہ ڈپو میں ہونے والے دھماکوں کے نتیجے میں بارود اور گولہ بارود کا ایک بہت بڑا ذخیرہ بھی تباہ ہو گیا۔
رپورٹ کے مطابق یہ گرینڈ آپریشن دو مراحل میں مکمل کیا گیا۔ یکم سے 3 جون تک جاری رہنے والے ابتدائی مرحلے میں ندیم کوٹ اور خوئیزی کے علاقوں میں 28 دہشت گرد مارے گئے تھے جبکہ متعدد زخمی ہوئے۔
اس کے بعد 4 سے 12 جون تک پلنگزئی کے علاقے میں سرچ اور کلیئرنس آپریشن کے دوران مزید 34 دہشت گرد انجام کو پہنچے۔ ہلاک ہونے والے عسکریت پسندوں میں 4 اہم ترین کمانڈرز شامل ہیں جن کی لاشیں تحویل میں لے لی گئی ہیں۔
کاروائی کے دوران سکیورٹی فورسز نے 8 مشتبہ افراد کو حراست میں لیا ہے جن سے تفتیش جاری ہے، جبکہ دہشت گردوں کے ایک مرکز سے ایک یتیم بچے کو بھی بحفاظت بازیاب کرایا گیا ہے، جسے مبینہ طور پر تشدد اور استحصال کا نشانہ بنایا جا رہا تھا۔
آپریشن کے دوران بھاری مقدار میں جدید اسلحہ اور دھماکہ خیز مواد بھی برآمد کیا گیا ہے، جس میں مشین گنز، 2 زرکائی رائفلز، 22 سب مشین گنز، ایک ایم-16 رائفل، ایک آر پی جی-7، اور بڑی تعداد میں مقامی طور پر تیار کردہ بم اور ایمونیشن شامل ہے۔