بلوچستان میں امن و امان کی بحالی اور دہشت گرد عناصر کے قلع قمع کے لیے پاک فوج، ایف سی اور پولیس کی جانب سے شروع کیا گیا مشترکہ آپریشن شعبان کامیابی سے جاری ہے، جس کے تحت کی جانے والی حالیہ کارروائیوں میں مزید 3 خارجی دہشت گرد مارے گئے ہیں۔
سکیورٹی ذرائع کے مطابق فورسز نے انٹیلی جنس معلومات پر دہشت گردوں کے ٹھکانوں پر زمین اور فضا سے انتہائی مؤثر اور مربوط حملے کیے۔ ان کارروائیوں کے دوران دہشت گردوں کی متعدد پناہ گاہوں کو کامیابی سے نشانہ بنا کر تباہ کر دیا گیا، جس کے بعد ‘آپریشن شعبان’ میں ہلاک ہونے والے دہشت گردوں کی مجموعی تعداد 88 ہو گئی ہے۔
ذرائع نے مزید تفصیلات بتاتے ہوئے واضح کیا کہ 5 جولائی سے اب تک صوبے کے مختلف حصوں میں جاری ‘آپریشن شعبان’ اور دیگر انٹیلی جنس بیسڈ آپریشنز کے دوران مجموعی طور پر 126 خارجی دہشت گرد اپنے عبرتناک انجام کو پہنچ چکے ہیں۔
سیکیورٹی فورسز کے حکام نے اس عزم کا اعادہ کیا ہے کہ بلوچستان کی پاک دھرتی سے آخری دہشت گرد کے مکمل خاتمے اور صوبے میں مستقل امن و استحکام کی بحالی تک ‘آپریشن شعبان’ پوری قوت کے ساتھ بلاامتیاز جاری رکھا جائے گا۔
