سکیورٹی فورسز نے بنوں اور ملحقہ علاقوں میں کارروائیاں کرتے ہوئے 24 خوارج ہلاک کر دیے۔ آئی ایس پی آر کے مطابق یہ کارروائیاں بنوں میں حالیہ دہشت گرد حملوں، پولیس پر حملوں اور گاڑی میں نصب خودکش بم دھماکے کے تناظر میں شروع کی گئیں۔
سکیورٹی فورسز نے قانون نافذ کرنے والے اداروں کے ساتھ مل کر وسیع پیمانے پر انٹیلی جنس بیسڈ مشترکہ آپریشنز کا آغاز کیا۔ گزشتہ 24 گھنٹوں کے دوران بنوں اور گردونواح میں شدید فائرنگ کے تبادلوں کے بعد فتنہ الخوارج سے تعلق رکھنے والے 24 دہشت گرد ہلاک کیے گئے۔
ہلاک ہونے والے دہشت گردوں سے اسلحہ اور گولہ بارود بھی برآمد کیا گیا۔ آئی ایس پی آر کے مطابق یہ عناصر متعدد کارروائیوں اور بے گناہ شہریوں کے قتل میں ملوث تھے۔ بیان میں کہا گیا کہ علاقے میں آپریشنز جاری رہیں گے اور حملوں کے ذمہ داروں کو انصاف کے کٹہرے میں لایا جائے گا۔
وفاقی ایپکس کمیٹی کے منظور کردہ نیشنل ایکشن پلان کے تحت عزمِ استحکام کے وژن کے مطابق کارروائیاں پوری قوت سے جاری رہیں گی۔
صدرِ مملکت آصف علی زرداری نے سکیورٹی فورسز کی کامیاب کارروائیوں کو ان کی پیشہ ورانہ مہارت اور قربانیوں کا مظہر قرار دیا۔
انہوں نے کہا کہ بھارتی سرپرستی میں سرگرم فتنہ الخوارج کے خلاف کارروائیاں منطقی انجام تک پہنچائی جائیں گی۔ وزیراعظم نے سکیورٹی فورسز کی بروقت اور مؤثر کارروائیوں کو قابلِ ستائش قرار دیا۔
وفاقی وزیر داخلہ محسن نقوی نے بھی سکیورٹی فورسز کی پیشہ ورانہ صلاحیتوں کو سراہا اور انہیں مبارکباد پیش کی۔