عالمی تنظیم لیبر بی ہائنڈ لیبر کی جانب سے پاکستانی گارمنٹ انڈسٹری میں اجرتوں کی خلاف ورزیوں سے متعلق ایک رپورٹ سامنے آئی تھی۔ تاہم پاکستان کے ایکسپورٹ اورینٹڈ ٹیکسٹائل اداروں کی جانب سے فراہم کردہ معلومات کے مطابق مقامی صنعتیں عالمی لیبر، ماحولیاتی اور پائیداری کے معیار کے مطابق کام کر رہی ہیں۔
عالمی ادارے آئی ایل او کی بیٹر ورک سنتھیسز رپورٹ (2022–2025) کے اعداد و شمار کا حوالہ دیتے ہوئے بتایا گیا ہے کہ برآمدی فیکٹریوں میں قوانین پر عمل درآمد کا تناسب بلند رہا، جہاں 2025 میں کم از کم اجرت کی عدم ادائیگی کا تناسب 4.6 فیصد اور اوور ٹائم کی ادائیگی نہ ہونے کا تناسب صرف 2.3 فیصد رہا۔
رپورٹ کے مطابق ان اقدامات کی بدولت بین الاقوامی خریداروں کے اعتماد میں بہتری دیکھی جا رہی ہے اور سروے میں شامل 33 فیصد عالمی خریداروں نے اگلے دو سے تین سالوں میں پاکستان سے برآمدات بڑھانے کا ارادہ ظاہر کیا ہے۔ پاکستان کی نمایاں ٹیکسٹائل کمپنیوں کی جانب سے مزدوروں کی فلاح، مساوی حقوق اور شفافیت کے لیے کیے جانے والے اقدامات کی تفصیلات درج ذیل ہیں:
انٹرلوپ لمیٹڈ نے صنفی مساوات کے فروغ کے لیے اپنے بورڈ میں 44 فیصد اور ایگزیکٹو لیڈرشپ میں 25 فیصد خواتین کی نمائندگی شامل کی ہے۔ اس کے علاوہ اعلیٰ و فنی تعلیم کے لیے 650 سے زائد اسکالرشپس اور کپاس کے کاشتکار علاقوں میں موبائل ہیلتھ کلینکس کی سہولت فراہم کی جا رہی ہے۔
گل احمد نے چائلڈ اور فورسڈ لیبر کی روک تھام اور ہراسانی کے خلاف زیرو ٹالرنس پالیسی نافذ کی ہے، جبکہ 2026 تک 15 فیصد خواتین ورک فورس اور 1,500 سے زائد نوجوانوں کو فنی تربیت دینے کا ہدف مقرر کیا ہے۔
سورٹی انٹرپرائزز اپنے پرزم پروجیکٹ کے ذریعے معذور افراد کو روزگار اور تربیت فراہم کر رہی ہے، جبکہ صحت کے شعبے میں جے پی ایم سی کے سائیکاٹرک انسٹی ٹیوٹ اور موسیٰ سورٹی سینٹر کے ذریعے سالانہ ہزاروں مریضوں کو علاج معالجے کی سہولت مل رہی ہے۔ نشاط ملز تمام ملازمین کو بلا تفریق مساوی مواقع اور پیشہ ورانہ تحفظِ صحت کی تربیت فراہم کر رہی ہے۔
لبرٹی ملز 200 معذور افراد کو روزگار اور 1,500 معذور بچوں کی بحالی میں معاونت کر رہی ہے، جبکہ 3,100 سے زائد طلبہ کو تعلیم اور سالانہ 14 لاکھ سے زیادہ افراد کو صحت کی سہولیات فراہم کرتی ہے۔ فیروز 1888 ملز اپنے انتظامی ملازمین کی مسلسل تربیت اور کمیونٹی سرگرمیوں پر عمل پیرا ہے۔ کریسنٹ باہومان ملازمین کی رہائش، ہیلتھ کیئر اور کریسنٹ اسکول کے ذریعے 1,200 بچوں کی تعلیم کا انتظام سنبھالے ہوئے ہے۔
کمال لمیٹڈ نے پنجاب حکومت کے تعاون سے ملازمین کو راشن کارڈز کی فراہمی اور ریسکیو 1122 کے ساتھ ایمرجنسی مشقوں کا اہتمام کیا ہے۔ گوہر ٹیکسٹائل ملز اپنے ملازمین کو مفت ٹرانسپورٹ، سبسیڈائزڈ کھانا اور طبی سہولیات فراہم کرتی ہے۔
ڈائمنڈ فیبرکس میں ملازمین کی ویلنس کے پروگرامز چلائے جا رہے ہیں، جبکہ سیفائر فنشنگ ملز نے ڈیف ریچ پروگرام کے تحت 150 سے زائد معذور افراد کو روزگار فراہم کیا ہے۔ مسعود ٹیکسٹائل ملز اور یوٹوپیا انڈسٹریز کی جانب سے بھی سپلائی چین رسک مینجمنٹ، انسانی حقوق کے تحفظ اور سیفٹی پروٹوکولز پر عمل درآمد کا دعویٰ کیا گیا ہے۔
