ملک بھر میں 26 جون سے جاری مون سون بارشوں کے باعث جاں بحق افراد کی تعداد بڑھ کر 151 ہو گئی ہے، جبکہ 448 افراد زخمی ہو چکے ہیں۔
نیشنل ڈیزاسٹر مینجمنٹ اتھارٹی (این ڈی ایم اے) نے 8 اگست سے بارشوں کے ایک نئے سلسلے کی پیش گوئی کرتے ہوئے متعلقہ اداروں کو الرٹ رہنے کی ہدایت کی ہے۔
این ڈی ایم اے کی تازہ رپورٹ کے مطابق سب سے زیادہ جانی نقصان خیبر پختونخوا میں ہوا، جہاں 64 افراد جاں بحق ہوئے۔ پنجاب میں 53، سندھ میں 15، آزاد کشمیر میں 10، بلوچستان میں 8 جبکہ گلگت بلتستان میں 1 شخص ہلاک ہوا۔ رپورٹ کے مطابق زیادہ تر اموات ڈوبنے، گھروں کی چھتیں یا دیواریں گرنے، کرنٹ لگنے اور اچانک سیلابی ریلوں کے باعث ہوئیں۔
این ڈی ایم اے کے مطابق بارشوں سے اب تک 448 افراد زخمی ہو چکے ہیں، جن میں 150 بچے، 108 خواتین اور 190 مرد شامل ہیں۔
8 اگست سے نیا سلسلہ
این ڈی ایم اے نے خبردار کیا ہے کہ موجودہ موسمی صورتحال کے پیشِ نظر 8 اگست سے ملک میں بارشوں کا نیا سلسلہ شروع ہو سکتا ہے۔ پنجاب، شمال مشرقی سندھ اور خیبر پختونخوا کے مختلف علاقوں میں درمیانے درجے کی بارشیں متوقع ہیں۔
رپورٹ کے مطابق 10 اگست سے مغربی ہواؤں کا نیا سلسلہ ملک کے بالائی علاقوں میں داخل ہوگا، جس سے اسلام آباد، آزاد کشمیر، گلگت بلتستان، خیبر پختونخوا اور بالائی پنجاب میں درمیانی سے شدید بارشوں کا امکان ہے۔
الرٹ رہنے کی ہدایت
این ڈی ایم اے نے متعلقہ اداروں کو پیشگی حفاظتی اقدامات یقینی بنانے اور نشیبی علاقوں میں خصوصی نگرانی کی ہدایت کی ہے تاکہ ممکنہ نقصانات کو کم سے کم رکھا جا سکے۔
واضح رہے کہ پاکستان دنیا کے ان ممالک میں شامل ہے جو موسمیاتی تبدیلیوں سے سب سے زیادہ متاثر ہو رہے ہیں، حالانکہ عالمی گرین ہاؤس گیسوں کے اخراج میں اس کا حصہ 1 فیصد سے بھی کم ہے۔
2022 کے تباہ کن سیلاب میں ملک کا تقریباً ایک تہائی حصہ زیر آب آ گیا تھا اور 1,700 سے زائد افراد جاں بحق ہوئے تھے۔ اس سانحے کے بعد حکومت نے برفانی جھیلوں کی نگرانی اور موسمی پیش گوئی کے نظام کو مؤثر بنانے کے اقدامات کیے، تاہم ماہرین کے مطابق موسمیاتی تبدیلیوں کے باعث شدید موسمی واقعات کی شدت میں مسلسل اضافہ ہو رہا ہے۔