خیبر پختونخوا کے ضلع ہنگو میں سیکیورٹی فورسز نے ایک مؤثر انٹیلی جنس بیسڈ آپریشن کے دوران بھارتی سرپرستی میں سرگرم فتنہ الخوارج کے 7 دہشت گردوں کو ہلاک کر دیا ہے۔
آئی ایس پی آر کے مطابق 7 اگست کو خوارج کی موجودگی کی اطلاع پر سیکیورٹی فورسز نے ان کے ٹھکانے کو کامیابی سے نشانہ بنایا۔
آئی ایس پی آر کے مطابق آپریشن کے دوران فائرنگ کے شدید تبادلے میں فتنہ الخوارج کے 7 دہشت گرد موقع پر ہی ہلاک ہو گئے۔
کارروائی کے دوران اپنے دستوں کی اگلی صفوں میں قیادت کرتے ہوئے 27 سالہ دلیر افسر کیپٹن حمزہ اکرام خوارج کا مسلسل تعاقب کرتے ہوئے جامِ شہادت نوش کر گئے۔
ہلاک ہونے والے دہشت گردوں کے قبضے سے بھاری مقدار میں اسلحہ اور گولہ بارود برآمد کر لیا گیا ہے، جبکہ یہ خوارج متعدد شہریوں کے قتل اور دہشت گردانہ کارروائیوں میں ملوث تھے۔
آئی ایس پی آر کا کہنا ہے کہ علاقے میں باقی ماندہ خوارج کے مکمل خاتمے کے لیے سینیٹائزیشن آپریشن بلا تعطل جاری ہے۔
صدرِ مملکت آصف علی زرداری نے شہید کیپٹن حمزہ اکرام کو زبردست خراجِ عقیدت پیش کرتے ہوئے کہا کہ مادرِ وطن اپنے اس دلیر سپوت کی قربانی پر فخر کرتی ہے اور دہشت گردی کے خلاف قومی عزم متزلزل نہیں ہوگا۔