سکیورٹی فورسز نے خیبر پختونخوا کے ضلع باجوڑ میں فتنہ الخوارج کے خلاف انٹیلی جنس بیسڈ آپریشن کیا، جس میں متعدد خوارج دہشت گرد ہلاک ہو گئے۔
ذرائع کے مطابق مسلسل نگرانی کے بعد فتنہ الخوارج کے متعدد ٹھکانوں کو پہلے کوئٹرکاپٹرز کے ذریعے نشانہ بنایا گیا، جس کے بعد ٹینک اور مارٹر گولہ باری کی مدد سے مکمل کلیئرنس آپریشن کیا گیا۔
کارروائی کے نتیجے میں ہلاک ہونے والے خوارج دہشت گردوں میں افغان شہری بھی شامل تھے، جو اس بات کا واضح ثبوت ہے کہ پاکستان میں امن و امان تباہ کرنے والی دہشت گرد کارروائیوں میں افغان باشندوں کا کردار مسلسل سامنے آ رہا ہے۔
سکیورٹی ذرائع کے مطابق فتنہ الخوارج کے دہشت گرد افغان سرزمین کو محفوظ پناہ گاہ کے طور پر استعمال کرتے ہیں اور وہاں سے سرحد پار کارروائیاں کرتے ہیں۔ آپریشن کے دوران دہشت گردوں کے متعدد ٹھکانے بھی مکمل طور پر تباہ کر دیے گئے۔
سکیورٹی فورسز نے آپریشن کے دوران دہشت گردوں کے قبضے سے بھاری مقدار میں اسلحہ اور گولہ بارود بھی برآمد کیا، جو ظاہر کرتا ہے کہ ان دہشت گردوں کو منظم انداز میں مسلح کیا جا رہا تھا۔
سکیورٹی ذرائع کے مطابق باجوڑ سمیت خیبر پختونخوا کے مختلف علاقوں میں فتنہ الخوارج کے خلاف آپریشنز تسلسل کے ساتھ جاری ہیں۔ فورسز کا کہنا ہے کہ دہشت گردوں کے ٹھکانوں کی نشاندہی اور ان کے خاتمے کے لیے انٹیلی جنس بیسڈ کارروائیاں مسلسل کی جا رہی ہیں تاکہ علاقے کو مکمل طور پر دہشت گردوں سے پاک کیا جا سکے۔
دیکھیے: بنوں: ہلاک دہشت گرد افغان شہری نکلا، کابل کا سرکاری اسلحہ لائسنس برآمد