بنوں میں سکیورٹی فورسز نے کامیاب کارروائی کے دوران گھات لگا کر حملہ کیا، جس کے نتیجے میں ایک انتہائی اہم دہشت گرد موقع پر ہی ہلاک ہو گیا۔ ہلاک ہونے والے دہشت گرد کی شناخت عبدالرحمان ولد امیر جان کے نام سے ہوئی ہے، جو افغان شہری اور امارت اسلامیہ افغانستان کا باقاعدہ رکن تھا۔
کارروائی کے بعد تلاشی کے دوران ہلاک افغان شہری کے قبضے سے امارت اسلامیہ افغانستان کا جاری کردہ ایس ایم جی رائفلا کا سرکاری لائسنس برآمد ہوا۔ اس لائسنس کے تحت ملزم کو کابل اور اس کے ملحقہ علاقوں میں مسلح ہو کر نقل و حرکت کرنے کا باقاعدہ اختیار دیا گیا تھا۔
یہ آپریشن اس تلخ حقیقت کو مزید واضح کرتا ہے کہ پاکستان کے اندر مختلف تخریبی سرگرمیوں اور سنگین جرائم میں افغان شہری مسلسل ملوث پائے جا رہے ہیں۔ سکیورٹی ذرائع کے مطابق پاکستان میں امن و امان کی صورتِ حال خراب کرنے والے ان عناصر کو افغان سرزمین سے براہِ راست سرپرستی اور تحفظ حاصل ہے۔
کابل انتظامیہ کی جانب سے جاری کردہ باقاعدہ کارڈ کی برآمدگی ثابت کرتی ہے کہ سرحد پار موجود پناہ گاہیں پاکستان مخالف عناصر کے لیے استعمال ہو رہی ہیں۔ پاکستان نے ایک بار پھر واضح کیا ہے کہ افغان حکام اپنی سرزمین سے پاکستان کے خلاف ہونے والی دہشت گردانہ سرگرمیوں کا سلسلہ فوری طور پر بند کروائیں۔
دیکھیے: بنوں جانی خیل میں سکیورٹی فورسز کی کارروائی، 2 شدت پسند ہلاک