پمز ہسپتال کے مدر اینڈ چائلڈ ہیلتھ (ایم سی ایچ) وارڈ کی نرسری میں رات گئے ہولناک آگ لگنے سے 15 نومولود بچے جاں بحق ہو گئے۔ ہسپتال انتظامیہ نے سانحے کی تصدیق کر دی ہے۔
ریسکیو ذرائع کے مطابق آتشزدگی کا واقعہ ایم سی ایچ وارڈ کی تیسری منزل پر پیش آیا، جہاں ایئرکنڈیشنر کے کمپریسر میں اچانک دھماکا ہوا۔ آگ اتنی تیزی سے پھیلی کہ نرسری میں موجود بچوں کو بچانے کا موقع نہ مل سکا۔
ایک بچے کو بحفاظت نکال لیا
واقعے کے وقت نرسری میں کل 16 بچے زیرِ علاج تھے۔ ڈیوٹی پر موجود ایک لیڈی ڈاکٹر نے اپنی جان پر کھیل کر ایک بچے کو محفوظ مقام پر منتقل کر دیا، تاہم دیگر 15 بچے شدید جھلسنے کے باعث دم توڑ گئے۔
اطلاع ملتے ہی فائر بریگیڈ کی 6 گاڑیوں اور 4 ایمبولینسز نے موقع پر پہنچ کر امدادی کارروائیوں کا آغاز کیا۔ ریسکیو حکام کے مطابق آگ پر مکمل طور پر قابو پا لیا گیا ہے اور کولنگ کا عمل جاری ہے۔
وزیراعظم کا اظہارِ افسوس
وزیراعظم محمد شہباز شریف نے واقعے کا سخت نوٹس لیتے ہوئے شدید رنج و غم کا اظہار کیا ہے۔ انہوں نے غمزدہ خاندانوں سے تعزیت کرتے ہوئے غفلت کے ذمہ داروں کا تعین کر کے سخت ترین کارروائی کی ہدایت کی ہے۔ گورنر خیبرپختونخوا فیصل کریم کنڈی نے بھی سانحے کو انتہائی دلخراش قرار دیتے ہوئے لواحقین سے دلی ہمدردی ظاہر کی۔
ضلعی انتظامیہ نے آتشزدگی کی وجوہات اور غفلت کا سراغ لگانے کے لیے ایڈیشنل ڈپٹی کمشنر کی سربراہی میں ایک اعلیٰ سطح کی انکوائری کمیٹی قائم کر دی ہے جو جلد اپنی رپورٹ پیش کرے گی۔
تحقیقات کا حکم
اس واقعے پر ضلعی انتظامیہ نے 8رکنی انکوائری کمیٹی تشکیل دیدی۔ انکوائری کمیٹی کی سربراہی ایڈیشنل ڈپٹی کمشنر کریں گے،کیپیٹل ایمرجنسی سروسز کے ڈی جی اور ایس پی سٹی کمیٹی میں شامل ہیں، اس کے علاوہ اسسٹنٹ کمشنر آئی نائن اور ڈی جی سی ڈی اے بھی کمیٹی میں شامل ہیں،انکوائری کمیٹی تحقیقات کے بعد24گھنٹے میں رپورٹ پیش کرے گی۔
وفاقی وزیر صحت
وفاقی وزیر صحت مصطفیٰ کمال نے کہا ہے کہ 14 بچوں کے جاں بحق ہونے کی تصدیق ہوچکی ہے، ڈی جی ہیلتھ اور سیکریٹری ہسپتال میں ہیں، میں کراچی میں ہوں اور اسلام آباد جارہا ہوں، متعلقہ حکام اور والدین کے ساتھ رابطے میں ہیں۔
مصطفیٰ کمال نے کہا ہے کہ 6 بج کر 45 منٹ پر ایئر کنڈیشن میں دھماکے کے بعد آگ لگی جو بہت تیزی سے پھیلی، دھماکے کے ساتھ ہی ہسپتال کی بجلی بھی چلی گئی تھی۔
دیکھیے: ملک بھر میں نبی آخر الزماں ﷺ کا یومِ ولادت عقیدت و احترام سے منایا جا رہا ہے