بلوچستان: کوئٹہ کے علاقے مسلم آباد میں فتنۃ الہندوستان سے منسلک دہشت گردوں نے بزدلانہ کارروائی کرتے ہوئے معروف تاجر حاجی صلاح الدین خان نورزئی کو فائرنگ کر کے قتل کر دیا ہے۔
ذرائع کے مطابق فائرنگ کا یہ افسوسناک واقعہ مسلم آباد میں پیش آیا جہاں مسلح دہشت گردوں نے حاجی صلاح الدین نورزئی کو بلااشتعال نشانہ بنایا، جس کے نتیجے میں وہ موقع پر ہی دم توڑ گئے۔
واقعے کے فوری بعد حملہ آور فرار ہونے میں کامیاب ہو گئے، جبکہ علاقے میں شدید خوف و ہراس پھیل گیا اور تاجر برادری میں غم و غصے کی لہر دوڑ گئی۔
اطلاع ملتے ہی سکیورٹی فورسز اور قانون نافذ کرنے والے ادارے موقع پر پہنچ گئے، علاقے کو گھیرے میں لے کر شواہد اکٹھے کیے اور دہشت گردوں کی گرفتاری کے لیے سرچ آپریشن شروع کر دیا گیا ہے۔
ابتدائی رپورٹس کے مطابق اس بزدلانہ قتل کا براہِ راست الزام فتنۃ الہندوستان کے دہشت گردوں پر عائد کیا جا رہا ہے، جو صوبے کا امن تباہ کرنے اور تاجروں کو بلیک میل کرنے میں ملوث ہیں۔
متاثرہ خاندان کے مطابق مقتول تاجر کے بیٹے کو بھی تقریباً آٹھ ماہ قبل اغوا کیا گیا تھا جو تاحال لاپتا ہے، اور اب والد کے سنسنی خیز قتل نے خاندان پر بربادی کا پہاڑ توڑ دیا ہے۔
کاروباری تنظیموں کا کہنا ہے کہ تاجروں اور ٹرانسپورٹرز کو نشانہ بنانا فتنۃ الہندوستان کی وہ گھناؤنی سازش ہے جس کا مقصد بلوچستان کے معاشی ماحول کو مفلوج کرنا اور خوف پھیلانا ہے۔
سکیورٹی اداروں نے عزم ظاہر کیا ہے کہ فتنۃ الہندوستان کے اس بزدلانہ حملے میں ملوث تمام عناصر اور ان کے سہولت کاروں کو قانون کے کٹہرے میں لاکر کیفرِ کردار تک پہنچایا جائے گا۔