بلوچستان کے ضلع دوکی میں سڑک کی تعمیر میں مصروف نجی کمپنی کے کیمپ پر مسلح افراد نے حملہ کر دیا۔
یہ واقعہ نانا صاحب زیارت کے مقام پر پیش آیا، جہاں دُکی-چمالنگ سڑک کی تعمیر کا کام جاری تھا۔
تعینات محافظوں نے حملہ آوروں کی مزاحمت کی، تاہم فائرنگ کے تبادلے میں ایک گارڈ شہید اور ایک زخمی ہو گیا۔ حملہ آور کیمپ میں مقیم 18 مزدوروں کو یرغمال بنا کر نامعلوم سمت فرار ہو گئے۔
ترقی کی راہ روکنے کی سازش
ذرائع کے مطابق بیرونی اشاروں پر کام کرنے والے عناصر صوبے میں معاشی ترقی اور سڑکوں کے بنیادی ڈھانچے کا راستہ روکنا چاہتے ہیں۔
معصوم محنت کشوں کو نشانہ بنا کر عوام کو روزگار اور بنیادی سہولیات سے محروم کرنے کی کوشش کی جا رہی ہے۔ ان بزدلانہ کارروائیوں سے ترقی کا دشمن چہرہ بے نقاب ہو چکا ہے۔
آخری دہشت گرد تک جنگ کا عزم
سکیورٹی ذرائع کا کہنا ہے کہ ریاست مخالف عناصر اور دشمن ممالک کے ناپاک عزائم کو ہر صورت خاک میں ملایا جائے گا۔
ملک سے آخری دہشت گرد کے مکمل خاتمے تک جنگ پوری قوت سے جاری رہے گی۔
سکیورٹی فورسز نے پورے علاقے کا محاصرہ کر لیا ہے اور مغویوں کی بحفاظت بازیابی کے لیے سرچ آپریشن تیزی سے جاری ہے۔