اسلام آباد میں منعقدہ عالمی فکر و دانش کے اہم فورم مارگلہ ڈائیلاگ کے دوران نامور بھارتی دفاعی تجزیہ کار پروین ساہنی نے اعتراف کیا ہے کہ پاکستان نے کبھی بھارت کی علاقائی بالادستی اور دادا گیری کو قبول نہیں کیا اور پاکستان کا یہ مؤقف تاریخی اور سفارتی لحاظ سے بالکل درست تھا۔
پروین ساہنی کا کہنا تھا کہ بھارت کو اپنی موجودہ خارجہ پالیسی میں بنیادی تبدیلیاں لانے کی اشد ضرورت ہے۔ ان کے مطابق بھارتی ماہرین کا خود اپنی حکومت کی حکمت عملی کو ناکام قرار دینا مودی حکومت کے ان تمام عالمی دعوؤں کی حقیقت واضح کر دیتا ہے جو وہ دنیا کے سامنے پیش کرتی رہی ہے۔
انہوں نے علاقائی تعاون کی تنظیم سارک کی معطلی پر گفتگو کرتے ہوئے واضح کیا کہ سارک کی فعال بحالی اب اسی صورت ممکن ہے جب چین اس عمل کا آغاز کرے۔ اس بیان سے یہ بات نمایاں ہوتی ہے کہ بھارت اب اس خطے کے اہم ترین سفارتی اور اقتصادی پلیٹ فارم کو چلانے کی صلاحیت سے محروم ہو چکا ہے۔
بھارتی تجزیہ کار نے اس بات پر بھی زور دیا کہ جب تک نئی دہلی خطے کے چھوٹے ممالک کو برابر کا شراکت دار تسلیم نہیں کرتی اور ان پر اپنا تسلط قائم کرنے کی کوششیں بند نہیں کرتی، اس وقت تک سارک یا کوئی بھی دیگر علاقائی تنظیم کام نہیں کر سکتی۔ بھارت کا یہی طرزِ عمل اس کی سفارتی تنہائی کا باعث بن رہا ہے۔
جنوبی ایشیا کی موجودہ صورتحال پر روشنی ڈالتے ہوئے انہوں نے نشاندہی کی کہ اس وقت پورے خطے میں صرف بھارت اور اس کے اثر و رسوخ میں شامل بھوٹان ہی چین کے بیلٹ اینڈ روڈ منصوبے سے باہر ہیں۔ جب پورا خطہ اقتصادی ترقی کی جانب گامزن ہے، بھارت اپنی زبردستی کی پالیسیوں کے باعث تنہا ہوتا جا رہا ہے۔
مارگلہ ڈائیلاگ میں بھارتی تجزیہ کار کو آزادانہ اور کھلے عام اپنے خیالات کے اظہار کا موقع ملنا پاکستان کے مضبوط اور پرُاعتماد سفارتی اعصاب کا مظہر ہے۔ اس عالمی فورم نے یہ حقیقت بھی ثابت کر دی ہے کہ پائیدار ترقی اور علاقائی استحکام زبردستی کے تسلط سے نہیں بلکہ برابری اور احترام پر مبنی تعلقات سے ممکن ہوتا ہے۔
