سی ٹی ڈی نے خفیہ اور بروقت کارروائی کے دوران پاکپتن میں تخریب کاری کا ایک بڑا منصوبہ ناکام بنا دیا ہے۔
سی ٹی ڈی حکام کے مطابق 19 ایس پی چوک کے قریب کارروائی کر کے کالعدم تحریکِ طالبان پاکستان (فتنہ الخوارج) سے تعلق رکھنے والے ایک خطرناک دہشت گرد کو حراست میں لیا گیا ہے۔
حکام نے تصدیق کی ہے کہ گرفتار دہشت گرد کی شناخت عبدالرحیم کے نام سے ہوئی ہے، جس کا تعلق پشاور کے علاقے یونیورسٹی روڈ سے ہے۔ ملزم بڑی تباہی پھیلانے کی غرض سے بارودی مواد کے ساتھ چوک میں موجود تھا۔
ملزم کے قبضے سے دو کلوگرام سے زائد بارودی مواد، تین آئی ای ڈی بیٹریاں، پرائما کارڈز اور ڈیٹونیٹر فیوز سرکٹ برآمد کر لیے گئے ہیں۔
اطلاع ملتے ہی بم ڈسپوزل اسکواڈ کے عملے نے فوری طور پر موقع پر پہنچ کر برآمد شدہ تمام بارودی مواد کو بحفاظت ناکارہ بنا دیا۔
حکام کے مطابق ملزم شہر میں دہشت گردی کی بڑی واردات کر کے عوام میں خوف و ہراس پھیلانا چاہتا تھا۔ ملزم کے خلاف سی ٹی ڈی تھانے میں انسدادِ دہشت گردی ایکٹ کے تحت مقدمہ درج کر کے تفتیش شروع کر دی گئی ہے۔
دیکھیے: کے پی اور بلوچستان میں فورسز کی بڑی کارروائیاں، 7 دہشت گرد ہلاک